මේ වන විට රැඳවුම් නියෝග මත අපරාධ පරීක්ෂණ දෙපාර්තමේන්තුව (CID) භාරයේ පසුවන, රාජ්ය බුද්ධි සේවයේ හිටපු අධ්යක්ෂ විශ්රාමික මේජර් ජෙනරාල් සුරේෂ් සලේ මහතාව අධිකරණ නියෝගවලින් පිටතට ගොස් දිනපතා හමුවීමට කළ ඉල්ලීමක් ප්රතික්ෂේප කිරීමට CIDය පියවර ගෙන තිබෙනවා.
අපරාධ පරීක්ෂණ දෙපාර්තමේන්තුවේ අධ්යක්ෂ ශානි අබේසේකර මහතා විසින් සුරේෂ් සලේ මහතාගේ බිරිඳ වන මනෝරි සලේ මහත්මිය වෙත ලිඛිතව කරුණු දක්වමින් මේ බව දැනුම් දී තිබුණා.
සතියේ දින 5 පුරා සිය සැමියාට නීතිඥ අසිත සිරිවර්ධන මහතා හමුවීමට අවසර දෙන ලෙස ඇය කළ ඉල්ලීමට පිළිතුරු දෙමින් CID අධ්යක්ෂවරයා මෙම තීරණය දැනුම් දී තිබෙනවා.
සුරේෂ් සලේ මහතා මේ වන විට රෝහල්ගතව සිටින බැවින්, ඔහුගෙන් කිසිදු ප්රශ්න කිරීමක් හෝ විමර්ශනයක් සිදු වෙන්නේ නැහැ.
එබැවින් මෙම අවස්ථාවේදී දෛනිකව නීතිඥ උපදෙස් ලබා ගැනීමේ අවශ්යතාවයක් මතු නොවන බව CIDය පෙන්වා දෙනවා.
දෛනිකව නීතිඥවරයා හමුවීමට අවසර ඉල්ලා සිටින්නේ, ඒ හරහා දිනපතා මාධ්ය වෙත ප්රකාශ නිකුත් කිරීමේ දේශපාලනික අරමුණකින් බව අදාළ පිළිතුරු ලිපියේ සඳහන් වනවා.
නිරන්තරයෙන් නීතිඥවරයා හමුවීම තුළින් සැකකරුට අවශ්ය මානසික විවේකය අහිමි වී, සුවය ලැබීමේ ක්රියාවලියට බාධා එල්ල විය හැකි බව CID අධ්යක්ෂවරයා පෙන්වා දී තිබෙන්වා.
කෙසේ වුවද, ඔහුට නීතිඥ සහාය ලබා ගැනීම සීමා කර නොමැති අතර, අධිකරණය නියෝග කර ඇති පරිදි සතියකට වතාවක් එනම් සෑම බදාදා දිනකම ඔහුව හමුවීමට නීතිඥවරුන්ට අවස්ථාව පවතිනවා.
නීතිඥ හමුවීම් සීමා කළද, පවුලේ සාමාජිකයින්ට ඔහුව බැලීම සඳහා කිසිදු සීමාවක් පනවා නොමැබවත්, සුරේෂ් සලේ මහතාගේ බිරිඳට, දියණියට සහ පුතාට දවසේ ඕනෑම වේලාවක, අවස්ථා කිහිපයකදී වුවද රෝහලට ගොස් ඔහුව බැලීමට පූර්ණ අවසරය ලබා දී ඇති බවත් CIDය අවධාරණය කරනවා.