නව අධ්‍යාපන ප්‍රතිසංස්කරණ යටතේ, 2031 වසරේ සිට ක්‍රියාත්මක වන පරිදි අ.පො.ස. සාමාන්‍ය පෙළ විභාගය සඳහා පවතින සමස්ත විෂයයන් සංඛ්‍යාව 7ක් දක්වා සීමා කිරීමට සැලසුම් කර ඇති බව අග්‍රාමාත්‍ය හරිනි අමරසූරිය මෙනවිය ප්‍රකාශ කළාය.
අග්‍රාමාත්‍යවරියගේ ප්‍රධානත්වයෙන් පැවති පාර්ලිමේන්තුවේ අධ්‍යාපන ප්‍රතිසංස්කරණ පිළිබඳ අනුකාරක සභාවේදී මෙම කරුණු අනාවරණය වී තිබේ. ඉතිහාසය සහ සෞන්දර්ය විෂයයන් ද ඇතුළත්ව මෙම සංශෝධනය සිදුකිරීමට නියමිත බව එහිදී වැඩිදුරටත් සඳහන් විය.
මෙම නව ප්‍රතිසංස්කරණවල තවත් විශේෂ අංගයක් ලෙස, 10 සහ 11 ශ්‍රේණිවල සිට වෘත්තීය අධ්‍යාපනය හඳුන්වා දීමට නියමිත අතර, 12 සහ 13 ශ්‍රේණි සඳහා සමාජ සංහිඳියාව, නීතිය හා ආචාර ධර්ම පිළිබඳ මොඩියුල ඇතුළත් කිරීමද මීට අමතරව සිදු කෙරේ.
එසේම, මෙම අධ්‍යාපන ප්‍රතිසංස්කරණවල ආරම්භක පියවරක් ලෙස මේ වන විටත් 02 සහ 06 ශ්‍රේණි සඳහා අවශ්‍ය ක්‍රියාකාරකම් පොත්, ගුරු මාර්ගෝපදේශ සහ මොඩියුල සකස් කර අවසන් බව වාර්තා වේ.