ජාතියේ වටිනාම සම්පත වන දරුවන්ගේ ජීවිත සුරක්ෂිත කිරීම ඕනෑම රජයක ප්‍රධානතම වගකීම වන බව ලෝක ළමා දිනය වෙනුවෙන් සුබපැතුම් පණිවුඩයක් නිකුත් කරමින් ජනාධිපති අනුර කුමාර දිසානායක මහතා ප්‍රකාශ කරයි.
රටේ අනාගතය තීරණය වන්නේ දරුවන්ගේ නිර්මාණශීලීත්වය සහ අපේක්ෂා මත බැවින්, අද දවසේම ඔවුන්ගේ කුසලතාවලට පූර්ණ ඉඩකඩ සලසන පරිසරයක් නිර්මාණය කළ යුතු බව ජනාධිපතිවරයා පෙන්වා දෙයි. කිසිදු ජාති, ආගම්, භූගෝලීය හෝ ආර්ථික වෙනස්කමකින් තොරව සෑම දරුවෙකුටම අධ්‍යාපනය, නිසි පෝෂණය, සෞඛ්‍යය මෙන්ම සියලු ආකාරයේ හිංසනයන්ගෙන් ආරක්ෂාව ලැබීමේ අයිතිය තහවුරු කළ යුතු බවද එම නිවේදනයේ ස සඳහන් වේ.
දෙමාපියන්ට බරක් නොවන සහ වර්තමාන ලෝකයට ගැලපෙන කුසලතා පදනම් කරගත් අධ්‍යාපන ප්‍රතිසංස්කරණ මේ වන විටත් ආරම්භ කර ඇති බව සඳහන් කරන ජනාධිපතිවරයා, ශිෂ්‍යත්ව ක්‍රමවේද පුළුල් කිරීම සහ ළමා සංවර්ධන මධ්‍යස්ථානවල සිටින දරුවන්ගේ අනාගතය සුරක්ෂිත කිරීම රජයේ ප්‍රමුඛ අරමුණක් බව ප්‍රකාශ කරයි.
එසේම, අස්ථාවර ආර්ථික බලපෑම්වලින් තොර සුන්දර ළමා වියක් උරුම කර දීම සඳහා ආර්ථිකය නිවැරදි මාවතකට යොමු කරමින් සිටින බවත්, මත්ද්‍රව්‍ය උවදුරෙන් දරු පරපුර මුදාගැනීම වෙනුවෙන් “රටම එකට” ජාතික මෙහෙයුම ක්‍රියාත්මක කර ඇති බවත් ජනාධිපතිවරයා සඳහන් කරයි.
මෙවර “මනසින් සවිමත් – දරුවන් පොහොසත්” යන තේමාව යටතේ කාන්තා හා ළමා කටයුතු අමාත්‍යාංශය මගින් සංවිධානය කර ඇති ජාතික ළමා දින සැමරුම් වැඩසටහන් ඇගයීමට ලක් කළ ජනාධිපතිවරයා, ශ්‍රී ලාංකේය සියලු දූ පුතුන්ට සතුට හා බලාපොරොත්තුව පිරි සුබ ළමා දිනයක් වේවායි ප්‍රාර්ථනා කරයි.