සිරදඬුවම් විඳිමින් සිටින ගලගොඩඅත්තේ ඥානසාර හිමියන් වෙනුවෙන් රැස්වීම් පැවැත්වීම, අත්සන් එකතු කිරීම හෝ වෙනත් කිසිදු විරෝධතා ක්‍රියාමාර්ගයක් ගැනීම අවශ්‍ය නොවන බව මහරගම සෝමරතන හිමියන් පවසයි. ඥානසාර හිමියන් බේරාගැනීමේ අරමුණින් විවිධ සංවිධානාත්මක පියවර ගන්නා ලෙස ඇතැම් භික්ෂූන් වහන්සේලා සහ සිල් මෑණියන් වහන්සේලා දුරකථන මාර්ගයෙන් තමන් වහන්සේගෙන් ඉල්ලීම් කළද, එවැනි කිසිදු ක්‍රියාවකට මැදිහත් නොවන ලෙස උන්වහන්සේ ඔවුන්ට උපදෙස් දී තිබේ.
තමන් වහන්සේ වසර 45ක කාලයක් පුරා පැවිදි දිවිය ගත කරමින් ජනතාව වෙනුවෙන් විශාල සේවයක් ඉටුකර ඇති බවත්, ශ්‍රී ලාංකික දරුවන් 480 දෙනෙකු ජපානයට යොමු කිරීමට පවා කටයුතු කර ඇති බවත් සෝමරතන හිමියන් සඳහන් කරයි. බුදුදහම තුළ භික්ෂූන් වහන්සේලාගේ හික්මීම සහ සංවරභාවය ඉතා වැදගත් වන බව පෙන්වා දුන් උන්වහන්සේ, ධම්මචේතිය සූත්‍රය නිදර්ශනයකට ගනිමින් බුද්ධ ශ්‍රාවකයන් තුළ පැවති ආදර්ශවත් සංවරය පිළිබඳව කොසොල් රජතුමා පවා පැහැදීමට පත්වූ ආකාරය සිහිපත් කර දුන්හ.
ඥානසාර හිමියන් අධිකරණය හමුවේ හැසිරුණු ආකාරය සහ අනවශ්‍ය කරුණුවලට මැදිහත්වීම දීර්ඝ කාලයක සිට දක්නට ලැබුණු තත්ත්වයක් බව පෙන්වා දුන් උන්වහන්සේ, විශ්වවිද්‍යාල සමයේදී තරුණ භික්ෂූන් වහන්සේලා දේශපාලනඥයන්ගේ වැරදි අවශ්‍යතා සඳහා යොදාගැනීමේ ප්‍රතිඵලයක් ලෙස උන්වහන්සේ අද මෙවැනි අසරණ තත්ත්වයකට පත්ව ඇති බව ප්‍රකාශ කළහ. කෙසේ වෙතත්, ඥානසාර හිමියන්ගේ සිවුර ඉවත් කිරීමට පෙර සංඝ සභාවක් ලෙස මැදිහත් වී උන්වහන්සේට අවවාද අනුශාසනා කිරීමට අවස්ථාව තිබූ බවද මහරගම සෝමරතන හිමියෝ වැඩිදුරටත් අවධාරණය කළහ.