අත්අඩංගුවට ගැනීම වළක්වන නියෝගයක් නිකුත් කරන ලෙස ඉල්ලා හිටපු ජනාධිපති ආර්යා ශිරන්ති රාජපක්ෂ මහත්මිය මාලිගාකන්ද මහේස්ත්‍රාත් අධිකරණය හමුවේ ගොනු කර තිබූ අපේක්ෂිත ඇප ඉල්ලීම ප්‍රතික්ෂේප කිරීමට අධිකරණය නියෝග කර තිබේ.
අදාළ ඇප ඉල්ලීම අද (12) පෙරවරුවේ මාලිගාකන්ද මහේස්ත්‍රාත් ජනිතා රෝෂණී පෙරේරා මහත්මිය ඉදිරියේ කැඳවනු ලැබීය.
පසුගිය 05 වැනිදා නඩුව කැඳවූ අවස්ථාවේදී ශිරන්ති රාජපක්ෂ මහත්මිය වෙනුවෙන් පෙනී සිටි ජනාධිපති නීතිඥ අනිල් සිල්වා මහතා ඉදිරිපත් කළ කරුණු සලකා බැලීමෙන් අනතුරුව, අද දිනයේ අධිකරණය හමුවේ පෙනී සිටින ලෙස මූල්‍ය අපරාධ විමර්ශන කොට්ඨාසයේ අධ්‍යක්ෂවරයාට නියෝග කරමින් මහේස්ත්‍රාත්වරිය නොතිසි නිකුත් කර තිබිණි.
අදාළ අපේක්ෂිත ඇප අයදුම්පතෙහි වගඋත්තරකරු ලෙස මූල්‍ය අපරාධ විමර්ශන කොට්ඨාසයේ අධ්‍යක්ෂවරයා නම් කර තිබීම ඊට හේතු වී ඇත.
ඒ අනුව, අද දිනයේ අධිකරණය හමුවේ මූල්‍ය අපරාධ විමර්ශන කොට්ඨාසයේ අධ්‍යක්ෂවරයා ඉදිරිපත් කළ කරුණු සලකා බැලීමෙන් අනතුරුව, ශිරන්ති රාජපක්ෂ මහත්මිය ගොනු කර තිබූ අපේක්ෂිත ඇප ඉල්ලීම ප්‍රතික්ෂේප කිරීමට මහේස්ත්‍රාත්වරිය නියෝග කළාය.