ශිරන්ති, නාමල් සහ යෝෂිත රාජපක්ෂ යන පවුලේ තිදෙනෙකුට එරෙහි දූෂණ නඩු තුනක් අද කොළඹ අලුත්කඩේ අධිකරණයේදී එකම දිනකදී විභාගයට ගැනේ. දේශපාලන පවුලක සාමාජිකයන් තිදෙනෙකුට එරෙහි නඩු ත්‍රිත්වයක් මෙලෙස එකම දිනක විභාග වන පළමු අවස්ථාව මෙයයි.
ශිරන්ති රාජපක්ෂ මහත්මියගේ නඩුව
ජාතික ඉතිරි කිරීමේ බැංකුවෙන් ලබාගත් රුපියල් මිලියන 10ක මුදලක් ‘සිරිලිය සවිය’ සංවිධානයේ ගිණුමකට බැර කර සාවද්‍ය ලෙස පරිහරණය කිරීමේ චෝදනාව යටතේ ශිරන්ති රාජපක්ෂ මහත්මියට එරෙහිව පවරා ඇති නඩුව අද කොළඹ ප්‍රධාන මහේස්ත්‍රාත් අධිකරණය හමුවේ විභාග වේ. ඇය පසුගිය ඔක්තෝබර් 7 වනදා සිට රිමාන්ඩ් බන්ධනාගාරගතව පසුවෙයි.
නාමල් රාජපක්ෂ මහතාගේ නඩු
පසුගිය සැප්තැම්බර් මාසයේ සිට රක්ෂිත බන්ධනාගාරගතව සිටින පාර්ලිමේන්තු මන්ත්‍රී නාමල් රාජපක්ෂ මහතාට එරෙහිව රුපියල් මිලියන 100ක අල්ලසක් ලබාගැනීමේ චෝදනාව මත පවරා ඇති ‘ක්‍රිෂ් නඩුව’ ද අද එම අධිකරණයේදීම කැඳවීමට නියමිතයි. මෙම ක්‍රිෂ් ගනුදෙනුවට අදාළව ඔහුට එරෙහිව පවතින තවත් නඩුවකට ඔහුව ලබන 16 වනදා දක්වා රක්ෂිත බන්ධනාගාරගත කර ඇත.
ඊට අමතරව, ශ්‍රීලංකන් ගුවන් සමාගමට එයාර්බස් ගුවන්යානා මිලදී ගැනීමේදී ඇමෙරිකානු ඩොලර් මිලියන 2ක පමණ මුදලක් අයථා ලෙස පරිහරණය කිරීමේ සිද්ධියට අදාළව කොටුව මහේස්ත්‍රාත් අධිකරණයෙන් සැප්තැම්බර් 30 වෙනිදා ඇප නියම වූ අතර, එම සිද්ධිය සම්බන්ධයෙන් අලුත්කඩේ මහේස්ත්‍රාත්වරයා හමුවේ ඇති නඩුවේ ඇප ඉල්ලීම සලකා බැලීම ද අද දින සිදු කෙරේ.
යෝෂිත රාජපක්ෂ මහතාගේ නඩුව
නිසි අධ්‍යාපනික සුදුසුකම් නොමැතිව නාවික හමුදා විධායක ශිෂ්‍යභට නිලධාරියකු ලෙස බඳවාගෙන, බ්‍රිතාන්‍යයේ ‘Royal Navy Young Officers Course’ පාඨමාලාවට සහභාගි කරවීමෙන් රජයට පාඩු සිදුකළ බවට චෝදනා ලබා සිටින යෝෂිත රාජපක්ෂ මහතාට එරෙහි නඩුව අද කොළඹ මහාධිකරණය හමුවේ විභාගයට ගැනේ.
තවද, නාමල් රාජපක්ෂ මහතාගේ නඩුව විභාගයට ගත් පසුගිය සැප්තැම්බර් 29 වනදා, ලලිත් – කූගන් සිදුවීමට අදාළව සාක්ෂි දීම සඳහා හිටපු ජනාධිපති ගෝඨාභය රාජපක්ෂ මහතා ද කොළඹ අලුත්කඩේ ප්‍රධාන මහේස්ත්‍රාත් අධිකරණයේ පෙනී සිටියේය.