බන්ධනාගාර ආඥා පනත යාවත්කාලීන කිරීම සඳහා පත් කළ කමිටු වාර්තාව අද ජනාධිපති ලේකම්වරයා වෙත ලබාදීමට නියමිත බව අමාත්‍යාංශ ලේකම් ප්‍රින්ස් සේනාධීර පවසයි.
බන්ධනාගාර ආඥා පනත යටතේ සාදන ලද නීති රෙගුලාසි සහ නිත්‍ය නියෝග යාවත්කාලීන කිරීම සඳහා පත් කළ කමිටුව විසින් සකස් කරන ලද මෙම වාර්තාව, බුද්ධශාසන, ආගමික සහ සංස්කෘතික කටයුතු අමාත්‍යාංශයේ ලේකම් ප්‍රින්ස් සේනාධීර මහතා විසින් අද දින ජනාධිපති ලේකම්වරයාට ලබාදීමට නියමිතව තිබේ.
විශේෂයෙන්ම බන්ධනාගාරගත වන භික්ෂූන් වහන්සේ සම්බන්ධයෙන් බන්ධනාගාර ආඥා පනතේ සඳහන් රෙගුලාසි හා නිත්‍ය නියෝග කිහිපයක් සංශෝධනය කිරීම සම්බන්ධයෙන් මීට පෙර සාකච්ඡා වට කිහිපයක් පවත්වා ඇත. වර්තමාන ආගමික, සංස්කෘතික, නීතිමය, පරිපාලනමය සහ ප්‍රායෝගික අවශ්‍යතාවන්ට අනුකූල වන පරිදි මෙම නීති රෙගුලාසි කාලානුරූපීව සමාලෝචනය කර යාවත්කාලීන කිරීම සඳහා ජනාධිපතිවරයා විසින් මෙම විශේෂ කමිටුව පත් කරනු ලැබීය.
අධිකරණ සහ ජාතික ඒකාබද්ධතා අමාත්‍යාංශයේ අතිරේක ලේකම් පියුමන්ති පිරීස්, රාජ්‍ය පරිපාලන, පළාත් සභා සහ පළාත් පාලන අමාත්‍යාංශයේ අතිරේක ලේකම් වසන්ත ආරියරත්න, බෞද්ධ කටයුතු කොමසාරිස් ජනරාල් ආර්.එම්.ජී. සේනාරත්න සහ බන්ධනාගාර දෙපාර්තමේන්තුවේ කොමසාරිස්වරයෙකු වන ඒ.සී. ගජනායක යන මහත්ම මහත්මීන් මෙම කමිටුවේ සෙසු සාමාජිකයින් ලෙස කටයුතු කරති.