ශ්‍රීමත් අනගාරික ධර්මපාලතුමාගේ 162 වැනි ජන්ම සංවත්සරය නිමිත්තෙන් සංවිධානය කරන ලෝක බෞද්ධ සහයෝගිතා සම්මේලනයේ (WOBSA) 2026 සමුළුව ඔක්තෝබර් 25 සහ 26 යන දෙදින මාතරදී පැවැත්වීමට නියමිතයි.
සහන්‍යා පදනම (Sahanya Foundation) සහ ලෝක බෞද්ධ සහයෝගිතා සම්මේලනය එක්ව සංවිධානය කරන මෙම වැඩසටහන මාතර සෝලිස් හෝටලය සහ හිත්තැටිය රජමහා විහාරය කේන්ද්‍ර කරගනිමින් පැවැත්වෙනවා.
ඔක්තෝබර් 25 වැනි ඉරිදා පෙරවරු 9.55ට මහා සංඝරත්නය ඇතුළු ආරාධිත අමුත්තන් සහ ප්‍රධාන ආරාධිතයා ලෙස බුද්ධශාසන, ආගමික හා සංස්කෘතික කටයුතු අමාත්‍ය මහාචාර්ය හිනිදුම සුනිල් සෙනෙවි මහතා ඇතුළු විදේශීය නියෝජිතයන් පැමිණීමට නියමිතයි.
එදින පෙරවරු 10.00 සිට දහවල් 12.00 දක්වා ශ්‍රීමත් අනගාරික ධර්මපාලතුමා වෙනුවෙන් පැවැත්වෙන ස්මාරක සහ අනුස්මරණ උත්සවය මාතර හිත්තැටිය රජමහා විහාරයේදී පැවැත්වෙනවා. පස්වරුවේදී සෝලිස් හෝටලයේදී WOBSA වැඩමුළුව පැවැත්වීමට සැලසුම් කර තිබෙනවා.
ඔක්තෝබර් 26 වැනි සඳුදා පෙරවරු 8.00 සිට දහවල් 12.30 දක්වාද WOBSA වැඩමුළුව පැවැත්වෙන අතර, පස්වරු 1.30ට සංස්කෘතික සංචාරයක් පැවැත්වීමට නියමිතයි.
මෙම අවස්ථාවට විශේෂ ආරාධිතයෙකු ලෙස ඉන්දීය රංගන ශිල්පී ගගන් මලික් මහතාද එක්වීමට නියමිතයි.
මෙම සමුළුව සංවිධානය කරනු ලබන්නේ මාතර හිත්තැටිය රජමහා විහාරයේ විහාරාධිපති සහ සහන්‍යා පදනමේ සභාපති ආචාර්ය අග්‍රහැරේ කස්සප නායක ස්වාමීන් වහන්සේගේ මූලිකත්වයෙනි.