ජනාධිපතිවරුන්ගේ හිමිකම් (ඉවත් කිරිමේ) පනත් කෙටුම්පත වැඩි ඡන්ද 150කින් අද (10) පාර්ලිමේන්තුවේදී සම්මත විය.
කෙටුම්පතට පක්ෂව ඡන්ද 151ක් ලැබුණු අතර, විපක්ෂව එක් ඡන්දයක් පමණක් ලැබුණි.
ඒ අනුව පනත් කෙටුම්පත් කාරක සභා අවස්ථාවේදී කිසිදු සංශෝධනයකින් තොරව මෙම පනත සම්මත විය.
නව කෙටුම් පතට ඇතුළත් වන සංශෝධන මොනවද?
1986 අංක 4 දරන ජනාධිපතිවරුන්ගේ හිමිකම් පනත ඉවත් කිරීම පිණිස වූ පනත් කෙටුම්පත අධිකරණය සහ ජාතික ඒකාබද්ධතා අමාත්යවරයාගේ නියමය පරිදි පළ කර ඇත.
මෙම පනත 2025 අංක දරන ජනාධිපතිවරයන්ගේ හිමිකම් (ඉවත්කිරීමේ) පනත යනුවෙන් හඳුන්වනු ලැබෙන අතර, 1986 අංක 4 දරන ජනාධිපතිවරයන්ගේ හිමිකම් පනත මෙයින් ඉවත් කරනු ලබන බව සඳහන් වේ.
ඉවත්වන හිමිකම් මොනවාද?
- හිටපු ජනාධිපතිවරයකු හෝ ජනාධිපතිවරයෙකුගේ වැන්දඹුවට සපයන ලද යම් නිවසක් හෝ ගෙවන ලද යම් මාසික දීමනාව
- හිටපු ජනාධිපතිවරයකුට හෝ හිටපු ජනාධිපතිවරයෙකුගේ වැන්දඹුවට ගෙවන ලද මාසික ලේකම් දීමනාව සහ නිල ප්රවාහනය සහ වෙනත් සියලු පහසුකම්
- හිටපු ජනාධිපතිවරයෙකුගේ වැන්දඹූලට ගෙවන ලද මාසික විශ්රාම වැටුප
වරප්රසාද අහිමි වන්නේ කාටද?
දැනට ජීවතුන් අතර සිටින විශ්රාමික ජනාධිපතිවරුන් හා ජීවතුන් අතර නොමැති විශ්රාමික ජනාධිපතිවරුන්ගේ වැන්දඹුවට හිමිවන වරප්රසාද මින් ඉදිරියට හිමි නොවනු ඇත.
මෙරට පළමුවන විධායක ජනාධිපති ජේ. ආර් ජයවර්ධන සහ තෙවන විධායක ජනාධිපති ඩී.බී විජයතුංග යන විශ්රාමික ජනාධිපතිවරුන් සහ ඔවුන්ගේ වැන්දඹුවන් මේ වනවිට ජීවතුන් අතර නොමැත.
මෙරට දෙවන විධායක ජනාධිපතිවරයා ලෙස කටයුතු කළ රණසිංහ ප්රේමදාසගේ බිරිඳ වන එහෙමා ප්රේමදාස තවමත් ජීවතුන් අතර සිටින අතර මෙම පනත යටතේ ඇයට හිමි ඉහත වරප්රසාද අහිමි විය හැකිය.
එමෙන්ම දැනට ජීවතුන් අතර සිටින හිටපු ජනාධිපතිවරුන්වන චන්ද්රිකා බණ්ඩාරනායක කුමාරතුංග, මහින්ද රාජපක්ෂ, මෛත්රීපාල සිරිසේන, ගෝඨාභය රාජපක්ෂ සහ රනිල් වික්රමසිංහටද මෙම නවව කෙටුම්පත මගින් ඉහත සියලු හිමිකම් අහිමිවනු ඇත .