ජනාධිපති අනුර කුමාර දිසානායක අතින් මුල් ගල තබා පසුගිය වසරේ වැඩ ආරම්භ කරන ලද උතුරේ ඉදිවන පළමු ජාත්‍යන්තර ක්‍රිකට් ක්‍රීඩාංගණයේ වැඩ කටයුතු පරිසර අගැයීම් වාර්තාව නොමැති වීම හේතුවෙන් තාවකාලිකව නවතා දැමීමට නියෝග කර තිබේ.
ජනපති අතින් වැඩ මුල්ගල් තැබූ යාපනයේ ක්‍රිකට් ක්‍රීඩාංගණය
යාපනය, මණ්ඩතිව් දූපතෙහි ඉදි කෙරෙන යාපනය ජාත්‍යන්තර ක්‍රිකට් ක්‍රීඩාංගණයේ ඉදිකිරීම් 2025 වසරේ සැප්තැම්බර් 01 වන දා ජනාධිපතිවරයාගේ ප්‍රධානත්වයෙන් ආරම්භ කළේ ය.
එම ක්‍රිකට් ක්‍රීඩාංගණයේ පළමු තරගය පසුගිය වසර අවසන් වන විටත්, පළමු ජාත්‍යන්තර තරගය වසර 03ක් ඇතුළත පැවැත්වීමටත් හැකි වනු ඇති බවට ඒම අවස්ථාවේදී ජනාධිපතිවරයා විශ්වාසය පළ කළේ ය.
දිගුකාලීන සැලැස්මක් යටතේ මණ්ඩතිව් දූපත ජාත්‍යන්තර මට්ටමේ පහසුකම් සහිත ක්‍රීඩා නගරයක් බවට පත්කිරීම මෙහි අරමුණ වී තිබූ අතර මෙම ව්‍යාපෘතියට ක්‍රිකට් ක්‍රීඩාංගණයට අමතරව අංගසම්පූර්ණ පිහිනුම් තටාකාංගණයක් සහ ගෘහස්ථ ක්‍රීඩාගාරයක්, තරු පන්තියේ හෝටල්, අවන්හල් සහ සුඛෝපභෝගී මහල් නිවාස, සාප්පු සංකීර්ණ මෙන්ම විනෝදාස්වාද මධ්‍යස්ථානයක්ද ඇතුළත්ව තිබේ.
ප්‍රේක්ෂකයින් 40,000කට තරග නැරඹිය හැකි පරිදි අදියර හතරක් යටතේ මෙය ඉදි කිරීමට සැලසුම් කර තිබුණි.
එය සාර්ථකව නිම වූයේ නම්, ජාත්‍යන්තර දිවා/රාත්‍රී තරග පැවැත්විය හැකි ශ්‍රී ලංකාවේ පස්වන ක්‍රීඩාංගණය ලෙසත්, ජාත්‍යන්තර මට්ටමේ හත්වන ක්‍රීඩාංගණය ලෙසත් ඉතිහාසගත වීමට නියමිතව තිබුණි.
පරිසර බලපෑම් තක්සේරු වාර්තාව
මෙම ඉදිකිරීම් සඳහා අවශ්‍ය පාරිසරික අනුමැතිය මධ්‍යම පරිසර අධිකාරියෙන් ලබා ගෙන නොමැති වීම හේතුවෙන් අදාළ ඉදිකිරීම් කටයුතු නවතා පාරිසරික බලපෑම් තක්සේරු වාර්තාව සැකසීමට අවශ්‍ය උපදෙස් මීට දින කිහිපයකට ඉහතදී ලබා දුන් බව එම අධිකාරියේ සභාපතිවරයා පැවසීය.
පාරිසරික අගැයීම සිදුකිරීමට අවශ්‍ය අනුමැතිය ලබා දී ඇති බව පැවසූ මහාචාර්ය තිලක් හේවාවසම්, ඒ අනුව උපරිම වසර දෙකක පමණ කාලයක් සඳහා එම අනුමැතිය වලංගු බවත් ඊට පෙර අදාළ අගැයීම සිදුකර පරිසර වාර්තාව අනුමැතිය සඳහා මධ්‍යම පරිසර අධිකාරිය වෙත යොමු කළ යුතු බවත් පැවසීය.
