ජාතික තීරුබදු ප්‍රතිපත්තිය සංශෝධනය කිරීමට රජය තීරණය කර තිබේ.
ශ්‍රී ලංකාවේ වෙළෙඳ, ආයෝජන සහ රාජ්‍ය මූල්‍ය අරමුණු සඳහා රුකුලක් සැපයීමට විනිවිදභාවයෙන් යුතු පුරෝකථනය කළ හැකි සහ සංගත (Coherent) තිරුබදු රාමුවක් ස්ථාපනය කිරීමට ජාතික තීරු බදු ප්‍රතිපත්තිය හඳුන්වා දෙනු ලැබ ඇත.
අදාළ බදු සම්බන්ධිත අණපනත් සමග අනුකූලතාවය සහතික කිරීම සහ එකි ප්‍රතිපත්තිය ක්‍රියාත්මක කිරීම ආශ්‍රිත පැන නැගී ඇති ගැටලු විසඳීමේ අරමුණින් එම ප්‍රතිපත්තිය නැවත සමාලෝචනය කර යෝග්‍ය සංශෝධන හඳුන්වා දීම සඳහා 2025-11-03 දින පැවති අමාත්‍ය මණ්ඩල රැස්වීමේදී අනුමැතිය ලබා දී තිබේ.
ඒ අනුව, ජාතික තිරු බදු ප්‍රතිපත්ති කමිටුව විසින් මෑතකාලීන ආර්ථික, රාජ්‍ය මූල්‍ය සහ ඒ වෙළෙඳ කටයුතු ආශ්‍රිත දත්ත මෙන් ම අදාළ වන නීති අණපනත් සමග පූර්ණ වශයෙන් අනුකූල නොවන තීරුබදු ප්‍රතිපත්තියේ විධිවිධාන පිළිබඳ සවිස්තරාත්මක සමාලෝචනයක් සිදු කරනු ලැබ ඇතැයි රජය සඳහන් කරයි.
එසේ ම, ජාතික තිරුබදු ප්‍රතිපත්තියේ ව්‍යාකූලතාවන් ඉවත් කිරීම සහ ප්‍රතිපත්තිමය විධි විධාන හා ව්‍යාවස්ථාපිත අවශ්‍යතා සමග අනුකූලතාව සහතික කිරීම සම්බන්ධයෙන් පාර්ලිමේන්තුවේ මුදල් පිළිබඳ කාරක සභාව විසින් ලබා දෙනු ලැබ ඇති නිරීක්ෂණ ද එකී සමාලෝචනයේදී සැලකිල්ලට ගෙන ඇති බව ඊට අදාළව නිකුත් කළ කැබිනට් පත්‍රිකාවේ දැක්වේ.
ඒ අනුව, ජාතික තීරුබදු ප්‍රතිපත්ති කමිටුව විසින් ඉදිරිපත් කරන ලද නිර්දේශ මත පදනම්ව යාවත්කාලීන කළ ජාතික තීරුබදු ප්‍රතිපත්තිය ක්‍රියාත්මක කිරීමට කැබිනට් අනුමැතිය හිමි වී තිබේ.
මුදල්, ක්‍රම සම්පාදන සහ ආර්ථික සංවර්ධන අමාත්‍ය වශයෙන් ගුරු ජනාධිපති අනුර කුමාර දිසානායක ඉදිරිපත් කළ යෝජනාව සඳහා අමාත්‍ය මණ්ඩලයේ අනුමැතිය ලබා දෙන ලදී.
