කෘෂිකර්ම, පශු සම්පත්, ඉඩම් හා වාරිමාර්ග අමාත්‍යාංශය යටතේ ක්‍රියාත්මක වන කුඩා පරිමාණ කෘෂි ව්‍යාපාර සඳහා වන අහිතකර බලපෑම් අවම කිරීමේ ව්‍යාපෘතිය (SARP), දේශීය කෘෂි නිෂ්පාදනවල පෝෂණය හා ගොවි ආදායම ඉහළ නැංවීමේ අරමුණින් විශේෂ දැනුවත් කිරීමේ සහ ප්‍රායෝගික පුහුණු වැඩසටහන් මාලාවක් මේ දිනවල ක්‍රියාත්මක කරයි.
කෘෂිකාර්මික සංවර්ධනය සඳහා වූ ජාත්‍යන්තර අරමුදලේ (IFAD) ණය ආධාර යටතේ ක්‍රියාත්මක වන මෙම වැඩපිළිවෙළෙහි ප්‍රධාන අරමුණ වන්නේ දේශීයව නිෂ්පාදනය වන පෝෂ්‍යදායී කෘෂි ද්‍රව්‍යවලට අගය එකතු කිරීම මඟින්, ගෘහස්ථ පෝෂණ මට්ටම ඉහළ නැංවීම, ආහාර නාස්තිය අවම කිරීම සහ ගොවි පවුල්වල ආදායම් මාර්ග පුළුල් කිරීමයි.
කෘෂිකාර්මික නිෂ්පාදනය ඉහළ දැමීම පමණක් පවුලක පෝෂණය සුරක්ෂිත කිරීමට ප්‍රමාණවත් නොවන බවත්, වසර පුරා දේශීයව ලබාගත හැකි පෝෂ්‍යදායී ආහාර නිසි ලෙස පරිභෝජනය කිරීමේ සහ කල් තබාගැනීමේ වැදගත්කමත් මෙම වැඩපිළිවෙළ තුළින් අවධාරණය කෙරේ. ඒ අනුව, කෘෂි නිෂ්පාදන සැකසීම, සංරක්ෂණය සහ පසු අස්වනු හානිය අවම කිරීම පිළිබඳව විශේෂ අවධානය යොමු කර ඇත.
මෙම SARP ව්‍යාපෘතිය යටතේ හඳුන්වා දෙනු ලබන අගය එකතු කළ නිෂ්පාදන පෙළට පහත දැක්වෙන ඒවා ඇතුළත් වේ.
- පලතුරු ආශ්‍රිතව: වියළි පලතුරු, පලතුරු යුෂ, ජෑම් සහ සෝස් වර්ග.
- එළවළු සහ පලා වර්ග: වියළි නිෂ්පාදන, අච්චාරු සහ සෝස් වර්ග.
- ධාන්‍ය හා රනිල බෝග: පෝෂ්‍යදායී, අඩු කැලරි කෙටි ආහාර, පිටි මිශ්‍රණ, කැඳ මිශ්‍රණ සහ ක්ෂණික (Instant) ආහාර.
- තෙල් සහිත ඇට සහ බීජ (රටකජු, තල): බටර්, ටොෆී, සෝස්, අඩු කැලරි රසකැවිලි.
- බිම්මල්: අච්චාරු, පේස්ට්, සෝස් සහ වෙනත් නිෂ්පාදන.
- කිරි නිෂ්පාදන: යෝගට් සහ මුදවපු කිරි.
- කුළුබඩු: සෝස් වර්ග, කුළුබඩු මිශ්‍රණ, පේස්ට් වර්ග සහ සෞඛ්‍යයට හිතකර සීසනින් කියුබ් (Seasoning cubes)
ගොවීන්, ග්‍රාමීය කාන්තාවන් සහ ප්‍රජා කණ්ඩායම් ඉලක්ක කරගනිමින් පවත්වනු ලබන මෙම වැඩසටහන් මාලාව හරහා, පෝෂණයට සංවේදී ආහාර සැකසීම, ආහාර සංරක්ෂණය, ආහාර සුරක්ෂිතතාව සහ සුපිරිසිදුකම පිළිබඳ ප්‍රායෝගික දැනුම සහ කුසලතා ලබා දීමට කටයුතු යොදා ඇත.
මීට අමතරව, නිසි ඇසුරුම්කරණය (Packaging), ලේබල් කිරීම සහ ගබඩා කිරීම පිළිබඳ දැනුවත් කිරීම හරහා නිෂ්පාදනවල වෙළෙඳපොළ ආකර්ෂණය, ගුණාත්මකභාවය සහ කල් තබාගැනීමේ හැකියාව වැඩිදියුණු කිරීමට ද අපේක්ෂා කෙරේ.
මෙම පුළුල් වැඩපිළිවෙළ මඟින් දේශීය සම්පත් උපයෝගී කරගනිමින් පෝෂ්‍යදායී ආහාර පරිභෝජනය ප්‍රවර්ධනය කිරීම සහ ආහාර විවිධත්වය වැඩිදියුණු කිරීම සිදු කෙරේ. එමෙන්ම, ග්‍රාමීය මට්ටමින් නව කුඩා පරිමාණ ව්‍යාපාරික අවස්ථා නිර්මාණය කරමින් ගොවි ජනතාවගේ, විශේෂයෙන් ග්‍රාමීය කාන්තාවන්ගේ ආර්ථික ශක්තිය ඉහළ නැංවීමට මඟපෑදේ.
මෙම වැඩසටහන සහ තාක්ෂණික උපදෙස් ලබාගැනීමට කැමැත්තක් දක්වන ගොවීන් සහ උනන්දුවක් දක්වන පාර්ශ්වයන්ට, කුඩා පරිමාණ කෘෂි ව්‍යාපාර සඳහා වන අහිතකර බලපෑම් අවම කිරීමේ ව්‍යාපෘතිය (SARP) අමතා වැඩිදුර තොරතුරු ලබාගත හැකිය.
දුරකථන අංකය: 011 2770986
