ඇල්ල වැල්ලවාය ප්රදේශයේ අනතුරට ලක් වූ බස් රථයේ යාන්ත්රික දෝෂයක් තිබූ බවට අනාවරණය වී ඇතැයි පොලිස් මාධ්ය ප්රකාශක සහකාර පොලිස් අධිකාරී එෆ්. යූ. වුට්ලර් අද (06) පැවති මාධ්ය සාකච්ඡාවට එක්වෙමින් පැවසීය.
අනතුරට පත් අදාළ බස් රථය දැඩි පරිශ්රමයක් දරා ඊයේ (05) රාත්රියේදී ප්රපාතයෙන් ගොඩ ගැනිණි. සම්පූර්ණයෙන් විනාශ වී ගොස් තිබූ බස් රථයේ කොටස් ඇල්ල පොලිස් ස්ථානය වෙත රැගෙන ගිය අතර ජාතික ප්රවාහනාධිකාරියේ නිලධාරීන්ද බස් රථයේ සුන්බුන් පරීක්ෂාවට ලක් කළේය.
එමෙන්ම අනතුර සිදුවූ ස්ථානයත් ප්රවාහන අධිකාරියේ නිලධාරීන් අද පරීක්ෂාවට ලක් කර තිබේ. බස් රථයේ සුන්බුන් ලබන 08 වනදා රජයේ රස පරීක්ෂකවරයා වෙත යොමු කිරීමට නියමිතය.
මෙම අනතුරින් 15 ක් මියගිය අතර, අනතුරට හේතුව මෙතෙක් නිශ්චිතව අනාවරණය වී නොමැත.
කෙසේ වෙතත් එම බස් රථයේ කොන්දොස්තරවරයා සහ එහි ගමන් ගත් පුද්ගලයෙකු පැවසුවේ, බස් රථයේ තිරිංග අක්රිය වූ බව රියදුරු පැවසූ බවය.
මේ අතර ඇල්ල වැල්ලවාය මාර්ගයේ අනතුරට ලක්වූ බස් රථය 2023 ජාතික ගමනාගමන කොමිෂන් සභාවේ ලියාපදිංචියෙන් ඉවත් ඌ බස් රථයක් බව ප්රවාහන හා මහා මාර්ග නියෝජ්ය අමාත්ය වෛද්ය ප්රසන්න ගුණසේන පවසයි. ඔහු පවසන්නේ විනෝද චාරිකා සඳහා පමණක් භාවිතා කෙරෙන බස් රථ නියාමනය කිරීමට රට තුළ තවමත් නීති නොමැති බවයි.
