ශ්‍රී ලංකන් ගුවන් සේවයට එයාර්බස් ගුවන් යානා මිලදී ගැනීමේදී සිදුවූ බව කියන රුපියල් මිලියන 100ක අල්ලස් ලබාගැනීමේ චෝදනාවකට අදාළව අත්අඩංගුවට ගෙන රක්ෂිත බන්ධනාගාරගත කර සිටින ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ මහතා විශේෂ බන්ධනාගාර ආරක්ෂාව යටතේ පාර්ලිමේන්තු සභා වාරයට සහභාගී වීම සඳහා කැඳවාගෙන එනු ලැබීය.
මාධ්‍යවේදීන්ගේ ප්‍රශ්න හමුවේ දැක්වූ ප්‍රතිචාරය
පාර්ලිමේන්තු සංකීර්ණයට ඇතුළු වන අවස්ථාවේදී මාධ්‍යවේදීන් නැගූ ප්‍රශ්න හමුවේ අදහස් දැක්වීමෙන් වැළකී සිටි මන්ත්‍රීවරයා, “මම පාර්ලිමේන්තුවේදී කතා කරන්නම්” යනුවෙන් පමණක් පවසා සභා ගැබ දෙසට ගමන් කළේය.
සභාව අමතමින් කළ ප්‍රකාශය
අනතුරුව පාර්ලිමේන්තු සභාව ඇමතූ නාමල් රාජපක්ෂ මහතා, ආණ්ඩුව ලබාදුන් පොරොන්දු ඉටුකිරීමට අපොහොසත් වී ඇති බවට දැඩි ලෙස විවේචනය කළේය. ජනතාව මුහුණ දෙන ජීවන වියදම, ගොවීන්ගේ ගැටලු, සෞඛ්‍ය ක්ෂේත්‍රයේ ඖෂධ හිඟය සහ අධ්‍යාපන ක්ෂේත්‍රයේ පවතින ගැටලු පිළිබඳව ඔහු එහිදී දීර්ඝ ලෙස අදහස් දැක්වීය.
කෙසේ වෙතත්, තමා අත්අඩංගුවට ගැනීම හෝ දැනට තමාට එරෙහිව පවතින නඩුව සම්බන්ධයෙන් සභාව තුළදී කිසිදු ප්‍රකාශයක් නොකිරීම විශේෂත්වයකි.
අල්ලස් හෝ දූෂණ විමර්ශන කොමිෂන් සභාව (CIABOC) මගින් සිදුකළ පැය 5ක ප්‍රශ්න කිරීමකින් අනතුරුව නාමල් රාජපක්ෂ මහතාව අත්අඩංගුවට ගත් අතර, කොළඹ ප්‍රධාන මහේස්ත්‍රාත් අධිකරණය විසින් ඔහු ලබන සැප්තැම්බර් (18) වැනිදා දක්වා රක්ෂිත බන්ධනාගාරගත කිරීමට නියෝග කර ඇත.
