දිවයිනට බලපා ඇති වර්ෂාපතනය හේතුවෙන් ගිං ගඟ සහ කුඩා ගඟ ආශ්‍රිත පහත්බිම් සඳහා ඊයේ (20) නිකුත් කරන ලද ගංවතුර අනතුරු ඇඟවීමේ නිවේදනය ඉදිරි පැය 24 දක්වා තවදුරටත් දීර්ඝ කළ බව වාරිමාර්ග දෙපාර්තමේන්තුව නිවේදනය කරයි.
මේ හේතුවෙන් අදාළ ගංගා නිම්න ආශ්‍රිත පහත්බිම්වල වෙසෙන ජනතාව මෙන්ම ඒ හරහා වැටී ඇති මාර්ග භාවිතා කරන රියදුරන් ද දැඩි අවධානයෙන් කටයුතු කළ යුතු බව එම දෙපාර්තමේන්තුව පෙන්වා දෙයි.
ගිං ගඟ සහ කළු ගඟ ආශ්‍රිත තත්ත්වය
ගිං ගඟේ ඉහළ ජල පෝෂක ප්‍රදේශවලට ලැබුණු තද වැසි සමඟ තවලම, නාගොඩ, බද්දේගම, වැලිවිටිය – දිවිතුර යන ප්‍රාදේශීය ලේකම් කොට්ඨාසවල සහ ගිං ගඟ නිම්නයේ පහත්බිම්වල සුළු ගංවතුර තත්ත්වයක් නිර්මාණය විය හැකි බවට පෙරදැනුම් දී තිබිණි.
පෙරේදා (19) දිනයේ ගාල්ල දිස්ත්‍රික්කයේ ඉහළම වර්ෂාපතනය ලෙස උඩුගම ප්‍රදේශයෙන් මිලිමීටර් 132.5ක් සහ නෙළුව බටුවංගල ප්‍රදේශයෙන් මිලිමීටර් 126.5ක් වාර්තා වී ඇත.
එසේම කළු ගඟේ අතු ගංගාවක් වන කුඩා ගඟේ ජල මට්ටම මිල්ලකන්ද ප්‍රදේශයෙන් ඉහළ ගොස් සුළු ගංවතුර මට්ටමකට ආසන්න වී ඇති අතර, කැලණි ගඟේ හංවැල්ල, ග්ලෙන්කෝස් සහ අවිස්සාවේල්ල යන ප්‍රදේශවල ද ජල මට්ටම් ඉහළ අගයක පවතී.
වර්ෂාපතන දත්ත සහ ජලාශ ධාරිතාව
ගාල්ල, මාතර, බස්නාහිර, වයඹ, සබරගමුව, මහනුවර, නුවරඑළිය සහ මාතලේ යන තෙත් කලාපීය දිස්ත්‍රික්කවලට සැලකිය යුතු වැසි ලැබී ඇති අතර, පසුගිය දිනවලට සාපේක්ෂව යම් අඩුවීමක් තිබුණද තවදුරටත් වැසි ඇදහැලේ.
වාරිමාර්ග අධ්‍යක්ෂ ඉංජිනේරු එල්. එස්. සූරියබණ්ඩාර මහතා සඳහන් කළේ අද උදෑසන වන විට කැලණි ගඟේ ඉහළ ප්‍රදේශවලට මිලිමීටර් 100ත් 125ත් අතර වර්ෂාපතනයක් ලැබී ඇති අතර, පසුගිය පැය 24 තුළ අනෙකුත් ගංගා ද්‍රෝණි බොහොමයකට මිලිමීටර් 50ත් 80ත් අතර වැසියක් ලැබී ඇති බවයි. මහවැලි ගඟේ නාවලපිටිය සහ පේරාදෙණිය මෙන්ම අත්තනගලු ඔයේ ජල මට්ටම් අඩුවෙමින් පැවතුණද, එම ගංගාවල ජල මට්ටම් තවදුරටත් අවදානම් මායිමට ආසන්නව පවතින අතර මහවැලි ඉහළ ද්‍රෝණියට ලැබුණු වැසි නිසා කොත්මලේ සහ පොල්ගොල්ල ජලාශවල ජල මට්ටම් ද සැලකිය යුතු ලෙස ඉහළ ගොස් ඇත.
දිවයිනේ ජලාශවල සමස්ත ධාරිතාව මේ වන විට සියයට 34ත් 35ත් අතර ප්‍රමාණයක පවතින අතර, වියළි කලාපයට අධික වැසි නොලැබීම ඊට හේතුවී ඇත.
ජලයෙන් යටවූ ප්‍රදේශවල ජල ක්‍රීඩාවල යෙදීම හෝ බැසීම ඉතා අනතුරුදායක බව වාරිමාර්ග දෙපාර්තමේන්තුව අවධාරණයෙන් දැනුම් දෙයි.
