ඉහළ අධිකරණ විනිසුරුවරුන්ගේ විශ්‍රාම වයස දීර්ඝ කිරීම සඳහා ආණ්ඩුව විසින් ඉදිරිපත් කර ඇති 22 වන ආණ්ඩුක්‍රම ව්‍යවස්ථා සංශෝධනය සම්මත කිරීමට ජනමත විචාරණයක් අවශ්‍ය නොවන බව ශ්‍රේෂ්ඨාධිකරණය තීරණය කර තිබේ. කථානායක ජගත් වික්‍රමරත්න මහතා අද (22) පෙරවරුවේ මේ බව පාර්ලිමේන්තුවට නිවේදනය කළේය.
එමෙන්ම, අදාළ පනතේ දැක්වෙන වසර 06ක ධුර කාල සීමාව මෙම අවස්ථාවේ ධුරය දරන අග්‍රවිනිශ්චයකාරවරයාට අදාළ නොවන බවද ශ්‍රේෂ්ඨාධිකරණ තීරණයේ වැඩිදුරටත් දැක්වේ.
තවද, මහාධිකරණයේ සිට පහළට ඇති අධිකරණවල විනිසුරුවරුන්ගේ විශ්‍රාම වයස දීර්ඝ කිරීම සඳහා ඉදිරිපත් කර ඇති අධිකරණ සංවිධාන පනත් කෙටුම්පත ද පාර්ලිමේන්තුවේ සරල බහුතරයකින් සම්මත කළ හැකි බව ශ්‍රේෂ්ඨාධිකරණය තීරණය කර ඇති බව කථානායකවරයා පාර්ලිමේන්තුවට නිවේදනය කර ඇත.
