ශ්‍රී ලංකාවේ වැඩි ම ග්‍රන්ථ සංඛ්‍යාවක් ප්‍රකාශනයට පත් කළ බව සැලකෙන එස්. ගොඩගේ ප්‍රකාශන ආයතනයෙහි නිර්මාතෘ දේශබන්දු සිරිසුමන ගොඩගේ දිවි සැරියට සමු දුන්නේ ය.
මිය යන විට ඔහු 90 වන වියේ පසු විය.
දේශබන්ධු සිරිසුමන ගොඩගේගේ දේහය පිළිබඳ අවසන් කටයුතු මැයි 02 වන දා සිදු කිරීමට නියමිත ය.
එදින සවස 2.00ට බොරැල්ල සුසාන භූමියේදී අවසන් කටයුතු සිදු කෙරේ.
ළමා කාලය
1936 වයසේ මැයි මාසයේදී දකුණු පළාතේ මාතර දිස්ත්‍රික්කයේ පාලටුව ගම්මානයේ උපත ලැබූ ඔහු, සහෝදර සහෝදරියන් නව දෙනකුගෙන් යුත් පවුලක හය වැන්නා විය.
ද්විතීයික පාසලක් වූ පාලටුවේ ගුණරතන මහා විදුහලෙන් තම අධ්‍යාපනය සම්පූර්ණ කළ එස්. ගොඩගේ, වයස අවුරුදු 15 දී පමණ කොළඹට පැමිණ තිබුණේ, පවුලේ පැවති ආර්ථික ප්‍රශ්න හේතුවෙනි.
බලංගොඩ ආනන්ද මෛත්‍රිය හිමි හමු වීම
සිරිසුමන ගොඩගේගේ “ජීවිතය වෙනස් වුණේ බලංගොඩ ආනන්ද මෛත්‍රිය හාමුදුරුවන් නිසා. එයා ඒ හාමුදුරුවන් ළඟ වැඩ කරන කාලෙ ඉගෙන ගන්න පටන් අරන් තියෙනවා. එතනින් තමයි එයා පොත් ගැන උනන්දුවක් දක්වන්න පටන් අරන් තියෙන්නේ,” යනුවෙන් ඔහුගේ පවුලේ සාමාජිකයෙක් පැවසීය.
සිරිසුමන ගොඩගේ ශ්‍රී ජයවර්ධනපුර විශ්වවිද්‍යාලයේ පුස්තකාලයේ සහයකයෙකු ලෙස එක්වී ඇත්තේ, බලංගොඩ ආනන්ද මෛත්‍රිය හිමියන්ගේ සහයෙනි.
එහිදී ඔහු නැවත බැඳ සකස් කිරීම සඳහා තබා තිබූ හානි වූ පොත් බැඳීමට යොමු විය.
ඉන්පසු, පොත් බඳින්නෙකු ලෙස සේවය කළ ඔහු, 1956 වසරේදී කුඩා කඩ කාමරයක් කුලියට ගෙන පොත් අලෙවිසලක් ආරම්භ කළේ ය.
එහිදී, පොත් බැඳීමත්, පොත් විකිණීමත්, පුස්තකාලවලටත් පොත් සැපයීමත් සිදුකළ අතර පසුව පොත් ප්‍රකාශනය ආරම්භ කළේ ය.
පුස්තකාලවලට දැක්වූ අනුග්‍රහය
ශ්‍රී ලංකාවේ විවිධ ප්‍රදේශවල පිහිටි පුස්තකාල සඳහා ද පොත් ලබා දෙමින් සිරිසුමන ගොඩගේ පොතපත පරිශීලනයට අතහිත දුන්නේ ය.
පුස්තකාල සඳහා පොත් මිල දී ගැනීමට පැමිණෙන පුද්ගලයින්ට ඔවුන් සතු මුදල් ප්‍රමාණය ඉක්මවා වැඩි පොත් ගණනක් ලබා දීමට ඔහු කටයුතු කළේ ය.
මේ අතර, ඇතැම් පොත් ප්‍රකාශකයින් සහ ලේඛකයින් ඔහුට එරෙහිව අපහාස හා විවේචන ඉදිරිපත් කළ බව ද මහාචාර්ය කුලතිලක කුමාරසිංහ පැවසීය.
මහාචාර්යවරයා සඳහන් කළේ, ඇතැම් ප්‍රසිද්ධ ලේඛකයින් ඔහුගෙන් අයුතු ලෙස මුදල් ලබා ගත් අතර, වංචා කිරීම් ද කළ බව ය.
ගොඩගේ සාහිත්‍ය සම්මාන
ගොඩගේ සාහිත්‍ය සම්මාන උළෙල හරහා ද සිරිසුමන ගොඩගේ ලේඛකයින්ගේ අභිවෘද්ධිය සඳහා දායකත්වයක් දැක්වීය.
ගොඩගේ ප්‍රකාශන ආයතනය විසින් ප්‍රකාශනය කරනු ලබන ග්‍රන්ථ අතරින් වාර්ෂිකව විශිෂ්ට කෘති සඳහා අගැයීමක් ලබා දීම එම සම්මාන උළෙල හරහා සිදු කෙරේ.
මෙම සම්මාන උළෙල 1998 වසරේ ආරම්භ වූ අතර, පසුගිය වසරේ එහි 27 වන සම්මාන උළෙල පැවැත්විණි.
