ආසියානු ක්‍රීඩා උළෙලකදී හෙල්ල විසිකිරීමේ ඉසව්වෙන් ශ්‍රී ලංකාව වෙනුවෙන් ප්‍රථම වරට රන් පදක්කමක් දිනාගනිමින් ඓතිහාසික ජයග්‍රහණයක් අත්කර දුන් රුමේෂ් තරංගට ජනාධිපති අනුර කුමාර දිසානායක මහතා සුබපැතුම් පිරිනමා ඇත.
සිය X ගිණුමේ විශේෂ සටහනක් තබමින් ජනාධිපතිවරයා සඳහන් කර ඇත්තේ, මෙම අසමසම ජයග්‍රහණය හරහා රුමේෂ් සමස්ත ජාතියම ආඩම්බරයට පත්කළ බවයි. එමෙන්ම, ක්‍රීඩා ක්ෂේත්‍රයේ ඉහළම සිහිනය වන ඔලිම්පික් රන් පදක්කම කරා යන ඉදිරි ගමන සාර්ථක වේවායි ප්‍රාර්ථනා කළ ජනාධිපතිවරයා, ජාත්‍යන්තරය දිනන සියලුම ශ්‍රී ලාංකේය ක්‍රීඩක ක්‍රීඩිකාවන් වෙනුවෙන් රජයේ පූර්ණ සහයෝගය ලබාදීමට කැපවන බවද අවධාරණය කළේය.
ජපානයේදී පැවැත්වෙන මෙවර ආසියානු ක්‍රීඩා උළෙලේ පැවැති දැඩි වර්ෂාපතනය මධ්‍යයේ ඉතා අභියෝගාත්මක තරගයකට මුහුණ දුන් රුමේෂ්, පළමු වට 3 අවසානයේ 3 වැනි ස්ථානයේ පසු විය. එහිදී ඉන්දියානු ක්‍රීඩකයින් ඉදිරියෙන් සිටියද, සිය 4 වැනි උත්සාහයේදී මීටර් 88.33ක දක්ෂතාවක් දක්වමින් තරගයේ පෙරමුණ ගැනීමට ඔහු සමත් විය.
අනතුරුව සිය 6 වැනි සහ අවසාන උත්සාහයේදී මීටර් 88.55ක විශිෂ්ට දුරක් සටහන් කළ රුමේෂ්, ශ්‍රී ලංකාවට මෙවර තරගාවලියේ පළමු රන් පදක්කම හිමිකර දුන්නේය.
මෙම ඉසව්වේ රිදී සහ ලෝකඩ පදක්කම් ඉන්දීය ක්‍රීඩකයින් දිනාගත් අතර, තරගයට එක්වූ ශ්‍රී ලංකාවේ සුමේධ රණසිංහට හිමිවූයේ 6 වැනි ස්ථානයයි.
