මෙවර මැයි දිනය නිමිත්තෙන් සමගි ජන බලවේගය කොළඹදී සංවිධානය කරන මැයි දින රැළිය සඳහා එක්සත් ජාතික පක්ෂයටද ආරාධනාවක් සිදුකර තිබේ.
පක්ෂ මහලේකම් රංජිත් මද්දුම බණ්ඩාර මහතා විසින් මේ සම්බන්ධව ලිපියක් මගින් එක්සත් ජාතික පක්ෂ මහලේකම් තලතා අතුකෝරාළ මහත්මිය වෙත දන්වා යවා ඇත.
මෙවර සමගි ජන බලවේග මැයි දින රැළිය මැයි මස 01 දින මාලිගාවත්ත පී.ඩී. සිරිසේන ක්‍රීඩාංගණයේදී විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් පස්වරු 2.00ට ආරම්භ වීමට නියමිතව තිබේ.
ඒ අනුව එක්සත් ජාතික පක්ෂයට ආරාධනා කරමින් යවා ඇති මෙම ලිපිය තුළින් පක්ෂ මහලේකම් රංජිත් මද්දුමබණ්ඩාර මහතා සඳහන් කර ඇත්තේ රට හමුවේ ගොඩනැගී ඇති අභියෝග හමුවේ එක්සත් ජාතික පක්ෂය සහ සමගි ජන බලවේගය එක්ව කටයුතු කිරීමේ කාලය එළැඹ ඇති බවය.
ඒ අනුව මෙවර මැයි දින රැළිය සඳහා සමගි ජනබලවේගයේ නායක සජිත් ප්‍රේමදාස මහතාගේ උපදෙස් මත එක්සත් ජාතික පක්ෂයටද මෙම මැයි දින රැළිය සඳහා ආරාධනා කිරීමට තීරණය කළ බවද අදාළ ලිපිය මගින් සමගි ජනබලවේග පක්ෂ මහලේකම්වරයා එක්සත් ජාතික පක්ෂ මහලේකම් තලතා අතුකෝරළ මහත්මිය වෙත දන්වා යවා ඇත.
