මෑතකදී මහත් ආන්දෝලනයකට තුඩුදුන් ත්‍රිකුණාමලය, ශ්‍රී සම්බුද්ධ ජයන්ති බෝධිවර්ධන විහාරයේ අනවසර ඉදිකිරීම් කොටස් ඉවත් කර ඇති බැවින් එම විහාරස්ථානයේ විහාරාධිපති හිමියන්ට එරෙහිව ඉදිරි පියවර නොගන්නා බව නීතිපතිවරයා අද (අප්‍රේල් 28) අභියාචනාධිකරණයට දැනුම් දුන්නේ ය.
නීතිපති දෙපාර්තමේන්තුව අධිකරණයට දැනුම් දුන්නේ, වෙරළ සංරක්ෂණ දෙපාර්තමේන්තුව විසින් නිකුත් කළ බලපත්‍රයට අනුකූලව එම විහාරස්ථානයේ ඉදිකර තිබූ අනවසර කොටස් ඉවත් කර ඇති බව ය.
අදාළ විහාරස්ථානයේ අනවසර ඉදිකිරීම් කඩා ඉවත් කරන ලෙස වෙරළ සංරක්ෂණ දෙපාර්තමේන්තුව විසින් නිකුත් කරනු ලැබූ නියෝගය ක්‍රියාත්මක වීම වළක්වන ආඥාවක් නිකුත් කරන ලෙස ඉල්ලා එහි විහාරාධිපති හිමියන් ගොනුකර තිබූ රිට් පෙත්සම කැඳවූ අවස්ථාවේදී නීතිපතිවරයා වෙනුවෙන් පෙනී සිටි රජයේ නීතිඥවරයා එය දැනුම් දුන්නේ ය.
එම විහාරයේ විහාරාධිපති ත්‍රිකුණාමලයේ කල්‍යාණ වංශ තිස්ස හිමි විසින් මෙම පෙත්සම ඉදිරිපත් කර තිබිණි.
අධිකරණයේදී සිදු වුයේ කුමක් ද ?
මෙම පෙත්සම අද ධම්මික ගනේපොළ සහ ආදිත්‍ය පටබැඳිගේ යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවිණි.
එහිදී රජයේ නීතිඥවරයා සඳහන් කළේ, පෙත්සම්කාර ස්වාමීන් වහන්සේ විසින් වෙරළ සංරක්ෂණ දෙපාර්තමේන්තුව නිකුත් කර තිබූ බලපත්‍රයට අනුකූලව අදාළ ගොඩනැගිල්ලේ අනවසර ඉදිකිරීම් ඉවත් කරනු ලැබ ඇති හෙයින් පෙත්සම්කරුට එරෙහිව ඉදිරි පියවර ගැනීමට අපේක්ෂා නොකරන බව ය.
එහිදී පෙත්සම්කාර පාර්ශවය වෙනුවෙන් පෙනී සිටි ජනාධිපති නීතිඥ සුසන්ත බාලපටබැඳි අධිකරණය හමුවේ කරුණු දක්වමින් පැවසුවේ, වග උත්තරකාර පාර්ශවයේ දැනුම් දීම සම්බන්ධයෙන් සෑහීමකට පත්වන බව ය.
ඒ අනුව, අදාළ එකඟතාව සටහන් කර ගත් අභියාචනාධිකරණ විනිසුරු මඩුල්ල අනතුරුව පෙත්සම් විභාගය අවසන් කිරීමට ද තීන්දු කළේ ය.
