නීති විරෝධී ලෙස මගී බස් රථ සඳහා මාර්ග ධාවන බලපත්‍ර නිකුත් කිරීමේ සිද්ධියකට අදාළව සිදුකෙරෙන විමර්ශනයකට අනුව ජාතික ගමනාගමන කොමිෂන් සභාවේ (NTC) හිටපු සභාපති රේණුක පෙරේරා මහතා අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අද (17) අත්අඩංගුවට ගන්නා ලදී.
දක්ෂිණ අධිවේගී මාර්ගය තුළ ධාවනය සඳහා මගී ප්‍රවාහන බලපත්‍ර 56ක් නිකුත් කිරීමේදී සිදු වූ බව කියන අක්‍රමිකතාවයක් සම්බන්ධයෙන් ලැබුණු පැමිණිල්ලක් පදනම් කරගනිමින් මෙම විමර්ශන ක්‍රියාත්මක වේ. අදාළ බලපත්‍ර නිකුත් කිරීමේදී නීතිමය පටිපාටීන් උල්ලංඝනය කර ඇත්දැයි අල්ලස් කොමිසම වැඩිදුරටත් පරීක්ෂණ පවත්වයි.
අත්අඩංගුවට ගත් හිටපු සභාපතිවරයාගෙන් ප්‍රකාශ සටහන් කරගැනීමෙන් අනතුරුව, ඔහුව අධිකරණය හමුවට ඉදිරිපත් කිරීමට අල්ලස් හෝ දූෂණ චෝදනා විමර්ශන කොමිෂන් සභාව පියවර ගනිමින් සිටියි.
