2016 වසරේ කොළඹ තුම්මුල්ල ප්‍රදේශයේ එක්සත් ජාතීන්ගේ කාර්යාලය ඉදිරිපිට පැවති විරෝධතාවකට අදාළ නඩුවේ අධිකරණයට නොපැමිණීම හේතුවෙන් අත්අඩංගුවට ගැනීමේ වරෙන්තුවක් නිකුත් කිරීමෙන් පැය කිහිපයකට පසු හිටපු අමාත්‍ය විමල් වීරවංශ මහතා අද (21) කොළඹ මහේස්ත්‍රාත් අධිකරණයට පැමිණ තිබෙනවා.
කොළඹ ප්‍රධාන මහේස්ත්‍රාත් අසංග එස්. බෝදරගම මහතා විසින් අද උදෑසන මෙම වරෙන්තුව නිකුත් කර තිබුණා. විමල් වීරවංශ මහතා ගමන් කළ රථයේ ඇති වූ යාන්ත්‍රික දෝෂයක් හේතුවෙන් නියමිත වේලාවට අධිකරණයට පැමිණීමට නොහැකි වූ බව ඔහුගේ නීතිඥවරයා අධිකරණයට දැනුම් දුන්නා.
වරෙන්තුව ආපසු කැඳවන ලෙස කළ ඉල්ලීම සම්බන්ධයෙන් කරුණු සලකා බැලීම හෙට (22) සිදුකරන ලෙස මහේස්ත්‍රාත්වරයා නියෝග කර තිබෙනවා.
2016 වසරේ එක්සත් ජාතීන්ගේ මානව හිමිකම් පිළිබඳ හිටපු මහ කොමසාරිස් සෙයිද් රාද් අල් හුසේන් මහතා ශ්‍රී ලංකාවට පැමිණීමට විරෝධය පළ කරමින් මෙම විරෝධතාව පැවැත්වුණා. විරෝධතාව හේතුවෙන් මාර්ග අවහිර කිරීම සහ මහජන ප්‍රවාහනයට බාධා කිරීම සම්බන්ධයෙන් පොලිසිය විසින් නඩුව ගොනු කර තිබෙනවා.
විමල් වීරවංශ මහතා ඇතුළු සැකකරුවන් මීට පෙරද හේතුවෙන් අවස්ථා කිහිපයකදී අත්අඩංගුවට ගැනීමේ වරෙන්තු නිකුත් කර තිබෙනවා.
