ශ්‍රී ලංකා මහ බැංකුවේ මුදල් ප්‍රතිපත්ති මණ්ඩලය විසින් ඊයේ (29) දින ගනු ලැබූ තීරණයකට අනුව, දැනට පවතින 8.75% ක් වූ ආර්ථිකය අනුපාතය (OPR) තවදුරටත් එම මට්ටමේම පවත්වා ගෙන යාමට තීරණය කර තිබේ. දේශීය සහ ගෝලීය ආර්ථික තත්ත්වයන් මෙන්ම ඉදිරි ආර්ථික දැක්ම ද සැලකිල්ලට ගනිමින් මෙම තීරණයට එළඹ ඇති බව මහ බැංකුව නිවේදනය කරයි.
විශේෂයෙන්ම 2026 මැයි මාසයේදී ක්‍රියාත්මක කරන ලද දැඩි මුදල් ප්‍රතිපත්ති ක්‍රියාමාර්ගවල බලපෑම, මැදපෙරදිග කලාපයේ වර්ධනය වන භූ දේශපාලනික ආතතීන් සහ එල්නිනෝ කාලගුණික තත්ත්වයන් හේතුවෙන් මතුවිය හැකි අවදානම් පිළිබඳව ද මෙහිදී මුදල් ප්‍රතිපත්ති මණ්ඩලයේ අවධානය යොමු වී ඇත
මහ බැංකු දත්ත වලට අනුව, 2026 වසරේ පළමු අර්ධය තුළදී ශ්‍රී ලංකා ආර්ථිකය 4.7%ක සැබෑ වර්ධනයක් වාර්තා කරමින් අඛණ්ඩව ඔරොත්තු දීමේ හැකියාවක් පෙන්නුම් කර තිබේ. කෙසේ වෙතත්, 2026 අගෝස්තු මාසය වන විට මෙරට ප්‍රධාන උද්ධමනය වාර්ෂික පදනම මත 8% දක්වා ඉහළ ගොස් ඇත. බලශක්ති මිල ගණන් ඉහළ යාමේ බලපෑම ආර්ථිකයේ විවිධ අංශ වෙත සම්ප්‍රේෂණය වීම මීට ප්‍රධාන වශයෙන් හේතු වී ඇති බව පෙන්වා දෙන මහ බැංකුව, 2027 වසරේ පළමු කාර්තුව දක්වා උද්ධමනය ඉහළ තනි ඉලක්කම් මට්ටමක පවතිනු ඇති බවත්, ඉන් අනතුරුව එය 5%ක ඉලක්කය වෙත ක්‍රමයෙන් පහළ යනු ඇති බවත් අපේක්ෂා කරයි.
මේ අතර, 2026 අගෝස්තු මාසය අවසන් වන විට මෙරට දළ නිල විදේශ සංචිත ප්‍රමාණය අමෙරිකානු ඩොලර් බිලියන 6.9ක් දක්වා කැපී පෙනෙන ලෙස ඉහළ ගොස් තිබේ. ශ්‍රී ලංකා මහ බැංකුව විසින් සිදුකළ ශුද්ධ විදේශ විනිමය මිලදී ගැනීම් ද සංචිත ඉහළ යාම සඳහා ඍජුවම දායක වී ඇති බව මහ බැංකුව වැඩිදුරටත් සඳහන් කර සිටී.
