ඩුබායි රාජ්‍යයේදී අත්අඩංගුවට ගෙන ශ්‍රී ලංකාවට පිටුවහල් කරන ලද ප්‍රධාන පෙළේ සංවිධානාත්මක අපරාධ කල්ලි සාමාජිකයෙක් වන රංජිත් කුමාර හෙවත් ‘කොණ්ඩ රංජි’ කටුනායක බණ්ඩාරනායක ජාත්‍යන්තර ගුවන්තොටුපොළේදී අපරාධ පරීක්ෂණ දෙපාර්තමේන්තුව (CID) මගින් අත්අඩංගුවට ගෙන ඇත. ශ්‍රී ලංකා ආරක්ෂක අංශ සහ ඩුබායි ආරක්ෂක අංශ අතර ක්‍රියාත්මක වූ විශේෂ සම්බන්ධීකරණයක ප්‍රතිඵලයක් ලෙස සැකකරු මෙලෙස දිවයිනට රැගෙන ඒමෙන් පසු අපරාධ පරීක්ෂණ දෙපාර්තමේන්තුවේ භාරයට පත්ව තිබේ.
ඉතාලිය බලා නීතිවිරෝධී ලෙස පලායාමට උත්සාහ කිරීමේදී පසුගිය ජනවාරි (09) වැනිදා ඩුබායි ආරක්ෂක අංශ විසින් මොහුව අත්අඩංගුවට ගෙන තිබුණි. එම අවස්ථාවේදී සැකකරු සමඟ ඔහුගේ බිරිඳ සහ දරුවන් ද අත්අඩංගුවට පත්ව තිබූ නමුත්, පසුව සිදුකෙරුණු පරීක්ෂණවලින් අනතුරුව බිරිඳ සහ දරුවන් මුදාහැරීමට එරට බලධාරීන් කටයුතු කර තිබුණි.
පොලිස් මාධ්‍ය ප්‍රකාශක කාර්යාලය සඳහන් කරන පරිදි ‘කොණ්ඩ රංජි’ යනු මෙරට තුළ සිදුකෙරුණු සංවිධානාත්මක ඝාතන රැසකට සම්බන්ධ ප්‍රධාන පෙළේ අපරාධකරුවෙකි. විශේෂයෙන්ම, හිටපු අමාත්‍ය මංගල සමරවීර මහතාගේ සම්බන්ධීකරණ ලේකම්වරයාගේ ඝාතනය සම්බන්ධයෙන්ද මොහු දිගුකලක් තිස්සේ මෙරට පොලීසියට අවශ්‍ය කර සිටි ප්‍රධාන පෙළේ සැකකරුවෙකු ලෙස සැලකේ.
අපරාධ පරීක්ෂණ දෙපාර්තමේන්තුව විසින් මේ වන විට සැකකරු සම්බන්ධයෙන් වැඩිදුර විමර්ශන ආරම්භ කර ඇති අතර, මෙරට සිදුව ඇති අපරාධ රැසකට ඔහුගේ සම්බන්ධය කුමක්ද යන්න ඉදිරියේදී අනාවරණය වනු ඇත.
