පවතින ගංවතුර තත්ත්වය හේතුවෙන් අ.පො.ස. සාමාන්‍ය පෙළ සෞන්දර්ය විෂයයන්ට අදාළ ප්‍රායෝගික පරීක්ෂණ සඳහා සහභාගී වීමට නොහැකි වූ සබරගමුව පළාතේ සිසුන්ට වෙනත් දිනයකදී ඊට පෙනී සිටීමට අවස්ථාව සලසා දෙන බව විභාග දෙපාර්තමේන්තුව පවසයි.
විභාග කොමසාරිස් ජනරාල් ඉන්දිකා කුමාරි ලියනගේ මහත්මිය සඳහන් කළේ, පවතින අයහපත් කාලගුණය සහ ගංවතුර තත්ත්වය හමුවේ සිසුන්ට විභාග මධ්‍යස්ථාන වෙත ළඟා වීමට දැඩි බාධා එල්ල වී ඇති බවට ලැබුණු වාර්තා සැලකිල්ලට ගනිමින් මෙම තීරණය ගත් බවයි.
ඒ අනුව, ගංවතුර තත්ත්වය පහව ගිය පසු අදාළ විභාග මධ්‍යස්ථානය වෙත ගොස් අතිරේක ප්‍රායෝගික පරීක්ෂණ පැවැත්වෙන දිනයක් ලබා ගැනීමට සිසුන්ට අවස්ථාව සලසා දී තිබේ.
විභාගය මඟහැරුණු කිසිදු සිසුවෙකුට අසාධාරණයක් වීමට ඉඩ නොතබන බැවින්, මේ සම්බන්ධයෙන් සිසුන් හෝ දෙමව්පියන් කිසිදු ආකාරයක අනවශ්‍ය කලබලයක් හෝ බියක් ඇති කරගත යුතු නොමැති බව ද විභාග කොමසාරිස් ජනරාල්වරිය වැඩිදුරටත් අවධාරණය කළාය.
