රටක මූල්‍ය පද්ධතියේ ශක්තිය තීරණය වන්නේ ආයතන හා රෙගුලාසි මත පමණක් නොව ඒවා ක්‍රියාත්මක වන ආකාරය මත බවත්, මූල්‍ය අපරාධ වැළැක්වීමට රජය කැපවී සිටින බවත් අග්‍රාමාත්‍ය ආචාර්ය හරිනි අමරසූරිය පවසන්නීය. ශ්‍රී ලංකාවේ තෙවන අන්‍යෝන්‍ය ඇගයීම් වැඩසටහනේ සමාරම්භක අවස්ථාවට එක්වෙමින් අග්‍රාමාත්‍යවරිය මේ බව සඳහන් කළාය. මුදල් විශුද්ධිකරණය පිළිබඳ ආසියා පැසිෆික් කණ්ඩායම (APG) විසින් මෙහෙයවනු ලබන මෙම ඇගයීම, මූල්‍ය අපරාධ වැළැක්වීමේ ප්‍රගතිය ජාත්‍යන්තරයට පෙන්වීමට ලැබෙන හොඳ අවස්ථාවක් බවද ඇය පෙන්වා දුන්නාය.
දූෂණය හේතුවෙන් මූල්‍ය ආයතන කෙරෙහි මහජන විශ්වාසය පළුදු වීම ආර්ථික හා දේශපාලන ස්ථාවරත්වයට බලපාන බව අවධාරණය කළ අගමැතිනිය, එම විශ්වාසය යළි ගොඩනැඟීමට විනිවිදභාවය, වගවීම සහ නීතිය ඵලදායී ලෙස ක්‍රියාත්මක කිරීම අත්‍යවශ්‍ය බව පැවසුවාය. තවද, ජාත්‍යන්තර හවුල්කරුවන්ගේ හා ආයෝජකයන්ගේ විශ්වාසය තහවුරු කිරීම වෙනුවෙන් අදාළ සියලු පාර්ශ්වකරුවන් සමඟ සහයෝගයෙන් කටයුතු කිරීමට රජය සූදානම් බවද ඇය වැඩිදුරටත් ප්‍රකාශ කළාය.
