අවිධිමත් විදේශ ගමන් බලපත්‍ර චෝදනාවට වසර දෙකක සිර දඬුවම් නියම වූ ශෂී වීරවංශ මහත්මිය ඉදිරිපත් කළ අභියාචනය සලකා බැලීමට ශ්‍රේෂ්ඨාධිකරණය නොවැම්බර් 18 වැනිදා දින නියම කර තිබේ. අගවිනිසුරු ප්‍රීති පද්මන් සූරසේන, අචල වෙංගප්පුලි සහ ගිහාන් කුලතුංග යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ අද 26 මෙම පෙත්සම කැඳවූ අවස්ථාවේදී මෙම නියෝගය ලබාදී ඇත.
හිටපු අමාත්‍ය විමල් වීරවංශ මහතාගේ බිරිඳ වන ශෂී වීරවංශ මහත්මිය, ව්‍යාජ තොරතුරු ඇතුළත් කර විදේශ ගමන් බලපත්‍රයක් ලබාගැනීමේ චෝදනාවට වරදකාරිය කරමින් කොළඹ මහේස්ත්‍රාත් අධිකරණය විසින් නියම කළ සිර දඬුවමට එරෙහිව මෙම අභියාචනය යොමු කර තිබේ. ඉදිරිපත් වූ සියලු කරුණු සලකා බැලීමෙන් අනතුරුව වැඩිදුර සලකා බැලීම සඳහා නඩුව නොවැම්බර් 18 වැනිදා තෙක් කල් තබන ලදී.
