නිරිතදිග මෝසම සමඟ ඉදිරියේදී එල්ලිනෝ තත්ත්වයකට මුහුණ දීමට සිදුවනු ඇති බව කාලගුණ විද්‍යා දෙපාර්තමේන්තුව පවසයි.
එම දෙපාර්තමේන්තුවේ අධ්‍යක්ෂ ජනරාල් අතුල කරුණානායක මහතා පැවසුවේ මේ හේතුවෙන් නිරිත දිග මෝසම් වැසි තත්ත්වයේ අඩුවීමක් අපේක්ෂා කරන බවය.
එමෙන්ම මැයි 15න් පසුව නිරිත දිග මෝසමේ කාලපරිච්චේදයට අනුරූපව සුළං හමන රටාවෙහි ද වෙනස්වීමක් අපේක්ෂා කරන බව ඒ මහතා වැඩිදුරටත් පැවසීය.
එහිදී අදහස් දැක්වූ කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක මහතා,
”ඉදිරියේ අපිට එළඹෙන්නේ නිරත දිග මෝසම් කාල පරිච්ඡේදය.. ඒක මැයි මාසයේ ඉඳන් සැප්තැම්බර් වෙනකල් තියෙනවා.. මේ නිරිත දිග මෝසම ආරම්භ වන විට අපිට පැහැදිලිව පේනවා මැයි මාසයේ ඉඳන් ක්‍රම ක්‍රමයෙන් එල්ලිනෝ තත්ත්වයක් වර්ධනය වන බව.. එතකොට මේ තත්ත්ව දෙකම හේතු කරගෙන විශේෂයෙන්ම නිරිත දිග මෝසමේ වැසි තත්ත්වය තරමක් අඩු වෙන්න පුළුවන්.. මැයි 15න් පස්සේ නිරිත දිග මෝසමේ කාලපරිච්චේදයට අනුරූපව සුළං හමන රටා වෙනස්වීමක් අපිට පෙන්නුම් කරනවා… එවැනි අවස්ථාවලදී බොහෝ විට නිරිත දිග කොටසේ වැසි තත්ත්වයක් නිර්මාණය වෙන්න පුලුවන්.. උදේ ඉඳන් චිරි චිරි වැස්සක් වැටෙන්න පුලුවන්.. අකුණු ප්‍රමාණය අඩු වෙන්න පුලුවන්.. එසේ ටිකෙන් ටික වැස්ස ලැබෙනකොට අධික උණුසුම ක්‍රම ක්‍රමයෙන් පහළ යයි කියලා අපි ජනතාවට මතක් කරනවා..”
මේ අතර බස්නාහිර, සබරගමුව, මධ්‍යම, වයඹ සහ නැගෙනහිර පළාත්වලත් පොලොන්නරුව, ගාල්ල සහ මාතර දිස්ත්‍රික්ක වලත් පස්වරු 2න් පසුව වැසි හෝ ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුව සදහන් කර සිටී.
බස්නාහිර, සබරගමුව පළාත්වලත් ගාල්ල සහ මාතර දිස්ත්‍රික්කවලත් ඇතැම් ස්ථානවලට මි.මී. 50ට වැඩි තරමක තද වැසි ඇති විය හැකියි.
එමෙන්ම උතුරු සහ උතුරුමැද පළාත්වලත්, හම්බන්තොට දිස්ත්‍රික්කයේත් පැ.කි.මී. 30-40 පමණ තරමක තද සුළං ඇති විය හැකියි.
