රටේ ආර්ථික වර්ධනය අත්පත් කර ගැනීම සඳහා නව එකඟතාවකට එළඹිය යුතු නම් ජාත්‍යන්තර මූල්‍ය අරමුදල (IMF) සමඟ නව වැඩසටහනකට යොමුවීමට රජය සූදානම් බව ජනාධිපති අනුර කුමාර දිසානායක මහතා පවසයි. ඊයේ කොළඹදී පැවති ‘ශ්‍රී ලංකා ආර්ථික හා ආයෝජන සමුළුව 2026’ අමතමින් ජනාධිපතිවරයා මෙම අදහස් පළ කළේය.
මූල්‍ය අරමුදල සමඟ ක්‍රියාත්මක වූ පළමු සිව්වසර විස්තීර්ණ ණය පහසුකමේ ප්‍රධාන ඉලක්කය වූ සාර්ව ආර්ථික ස්ථාවරත්වය මේ වන විට සැලකිය යුතු මට්ටමකින් අත්පත් කරගෙන ඇති බව පෙන්වා දුන් ජනාධිපතිවරයා, එම ස්ථාවරභාවය ආරක්ෂා කරගනිමින් ආර්ථික වර්ධනය කරා ගමන් කිරීම රජයේ මීළඟ ඉලක්කය බව සඳහන් කළේය. ඒ අනුව ආර්ථික වර්ධනය ඉලක්ක කරගත් නව වැඩසටහනක් වෙනුවෙන් එකඟතාවකට පැමිණීමට හැකියාවක් ඇත්නම් ඒ සඳහා රජය සූදානම් බව ද ඔහු වැඩිදුරටත් අවධාරණය කළේය.
එමෙන්ම ශ්‍රී ලංකාව මේ වන විට ණය ශ්‍රේණිගත කිරීම්වලින් ඉහළට පැමිණ ඇති නමුත් තවත් ඉදිරි පියවරක් තැබිය යුතු බවත්, විදේශ සංචිත ප්‍රමාණය අපේක්ෂිත මට්ටමට ළඟා කරගත යුතුව ඇති බවත් ජනාධිපතිවරයා එහිදී පෙන්වා දුන්නේය. මීට අමතරව, කොළඹ වරායේ නැගෙනහිර පර්යන්තයේ හිමිකාරිත්වය රජය යටතේ තබාගනිමින් එහි කළමනාකරණ කටයුතු සඳහා සමාගමක් ස්ථාපිත කර, එහි කොටස් පෞද්ගලික ආයෝජකයෙකු වෙත ලබාදීමට රජය සැලසුම් කර ඇති බව ද ජනාධිපති අනුර කුමාර දිසානායක මහතා එහිදී අනාවරණය කළේය.
