ගතවූ පැය 24 තුළ මෙරටින් ඩෙංගු රෝගීන් 1,069 දෙනෙකු වාර්තා වී ඇති බව ජාතික ඩෙංගු මර්දන ඒකකයේ වැඩබලන අධ්යක්ෂ වෛද්ය කපිල කන්නන්ගර මහතා අනාවරණ කර සිටියි.
ඒ අනුව මෙරටින් මේ දක්වා වාර්තා වී ඇති සමස්ත ඩෙංගු රෝගීන් සංඛ්යාව 45,037ක් දක්වා ඉහළ ගොස් ඇති අතර, සිදුව ඇති සමස්ත මරණ සංඛ්යාව 28කි.
සාමාන්යයෙන් වසංගත තත්ත්වයක් නොමැති කාලසීමාවලදී මෙරටින් දෛනිකව වාර්තා වන්නේ රෝගීන් 150ත් 200ත් අතර සංඛ්යාවක් වන බවත් වත්මන් අවදානම් තත්ත්වයත් සමඟ මෑතකදී දෛනිකව වාර්තා වූ රෝගීන් සංඛ්යාව 600ත් 650ත් දක්වා ඉහළ ගිය බවත් ඒ මහතා පෙන්වා දුන්නේය.
එමෙන්ම වෛද්ය කපිල කන්නන්ගර මහතා වැඩිදුරටත් අවධාරණය කරන්නේ රෝගීන් වාර්තා වීම තවදුරටත් ඉහළ යමින් පවතින බැවින් මෙම තත්ත්වය කඩිනමින් පාලනය කරගත යුතු බවය.
රෝගීන් සංඛ්යාව මෙලෙස ශීඝ්රයෙන් ඉහළ යාම හේතුවෙන් මෙරට රෝහල්වල ධාරිතාවය මේ වන විටත් ඉක්මවා ගොස් ඇති බවත් මෙය දිගින් දිගටම සිදුවුවහොත් සමස්ත රෝහල් පද්ධතියම කඩා වැටීමේ බරපතළ අවදානමක් පවතින බවත් ඒ මහතා ප්රකාශ කළේය.
මීට අමතරව, රෝගීන් රැකබලා ගැනීමේදී වෛද්යවරුන්, හෙදියන් ඇතුළු සමස්ත සෞඛ්ය කාර්ය මණ්ඩලය ද මේ වන විට දැඩි මානසික සහ ශාරීරික පීඩනයකට පත්ව සිටින බවද වෛද්ය කපිල කන්නන්ගර මහතා පැවසීය.
එහිදී ඔහු වැඩිදුරටත් සඳහන් කළේ මෙම දැඩි පීඩනකාරී වටපිටාව හේතුවෙන් ඉදිරියේදී රෝගී මරණ සංඛ්යාව තවදුරටත් ඉහළ යාමේ ප්රවණතාවක් පවතින බවය.
