පූජ්‍ය ගලගොඩඅත්තේ ඥාණසාර හිමියන්ට බන්ධනාගාරය තුළදී සිවුර ඉවත් කර ජම්පරය ඇන්දවීම සිදුවූයේ ජාතික ජන බලවේගයේ ඉහළ දේශපාලන නායකයන්ගේ බලපෑම මත බවට තමන් වගකීමෙන් ප්‍රකාශ කරන බව පිවිතුරු හෙළ උරුමයේ නායක උදය ගම්මන්පිල මහතා පවසයි.
පසුගිය ඔක්තෝබර් 8 වනදා ඥාණසාර හිමියන්ගේ ඉල්ලීම පරිදි වැලිකඩ බන්ධනාගාරයට ගොස් උන්වහන්සේ බැහැදුටු අවස්ථාවේදී මෙම සිදුවීම සම්බන්ධයෙන් උන්වහන්සේ තමන්ට කරුණු පැහැදිලි කළ බව ගම්මන්පිල මහතා සඳහන් කළේය. බන්ධනාගාර නිලධාරීන් පිරිසක් බලහත්කාරයෙන් ජම්පරය ඇන්දවීමට උත්සාහ කළ බවත්, එක් නිලධාරියෙකු ජංගම දුරකතනයක් මගින් වෙනත් ස්ථානයක සිටින බලවත් පුද්ගලයෙකුට එම සිදුවීම සජීවීව නිරීක්ෂණය කිරීමට අවස්ථාව සලසා දී තිබූ බවත් උන්වහන්සේ පවසා ඇත.
තමන් සතුව ඉතිරිව තිබූ අවසන් භික්ෂු සලකුණ වූ අදනකඩය පවා ඉවත් කිරීමට සිදුවීමෙන් ඥාණසාර හිමියන් දැඩි කම්පනයට පත්ව සිටි බව ද ඔහු කියා සිටියේය. බන්ධනාගාරය තුළදී උන්වහන්සේට යළි සිවුර ඇන්දවීමට පැයක් වැනි කෙටි කාලයක් ප්‍රමාණවත් වුවද, ආණ්ඩුව කමිටු පත් කරමින් කාලය ගත කරන බවට චෝදනා කළ ගම්මන්පිල මහතා, මේ සම්බන්ධයෙන් ජනතාවගේ විරෝධය පළ කරන ලෙස ද ඉල්ලා සිටියේය.
සිය සමාජ මාධ්‍ය ගිණුම්වල ප්‍රදර්ශනය වන ඡායාරූපය කළු කොඩියක් බවට පත් කරමින්, සිවුරට සහ බුද්ධ ශාසනයට සිදුවන මෙම අසාධාරණයට එරෙහිව ජනතාව සිය විරෝධය පළ කළ යුතු බව ද ඔහු වැඩිදුරටත් පැවසීය.
