ජාතික ගමනාගමන හිමිකරුවන් හා කොමිෂන් සභාව විසින් පොදු මගී ප්‍රවාහන සේවා සපයන බස් රථ සේවකයින් සඳහා විශේෂ දැනුවත් කිරීමක් සිදු කර තිබේ.
දිවයිනට බලපා ඇති අයහපත් කාලගුණික තත්ත්වය හේතුවෙන් පොදු මගී ප්‍රවාහන සේවා සපයන බස් රථ සේවකයින් පහත සඳහන් කරුණු සම්බන්ධයෙන් දැඩි අවධානය යොමු කරන ලෙස නිවේදනයේ සඳහන් ය.
* අයහපත් කාලගුණික තත්ත්වය හේතුවෙන් මර්ග අවහිරතා පවතින අවස්ථාවලදී බස් රථ ධාවනය කරන විට පොලිස් මාර්ග බාධක යොදා ඇත්නම් එම ස්ථානයේ රාජකාරීයේ නියුතු පොලිස් නිලධාරීන්ගේ උපදෙස් තරයේ පිළිපදින ලෙස දන්වා තිබේ.
* ගංවතුර තත්ත්වයන් හේතුවෙන් මාර්ගය අපැහැදිලි ස්ථානවලට බස් රථය ඇතුළු කිරීම කිසිදු හේතුවක් මත සිදු නොකරන ලෙස තරයේ දන්වා සිටී.
* අයහපත් කාලගුණික තත්ත්වය හේතුවෙන් විකල්ප මාර්ග භාවිතා කිරීමේදී බස් රථයේ ගමන් කරන මගීන් ඒ පිළිබඳව දැනුවත් කළ යුතු අතර, විකල්ප මාර්ග භාවිත කිරීමේදී මගීන්ව ඔවුන්ගේ ගමනාන්තය කරා ගෙනයාමට නොහැකි අවස්ථාවක් ඇති වුවහොත්, ඒ පිළිබඳ දැනුවත් කර ඔවුන්ව ආසන්නතම ප්‍රධාන බස් නැවතුම්පොළට යොමු කරන ලෙසත්, හැකි සෑම අවස්ථාවකම මගීන් නියමිත ගමනාන්තයට රැගෙන යාමට කටයුතු කරන ලෙසත් දන්වයි.
* වර්ෂා තත්ත්වය මත රිය ධාවනය කරන රියදුරන් බස් රථයේ වේගය සම්බන්ධයෙන් විශේෂයෙන් සැලකිලිමත් විය යුතු අතර කිසිදු ලෙසකින් අධික වේගයෙන් බස් රථය ධාවනය නොකරන ලෙසත්, අධිවේගී මාර්ගවල බස් රථ ධාවනය කිරීමේදී ලබාදී ඇති නියමිත වේගසීමාවන්වලට යටත්ව බස් රථය ධාවනය කරවීමට වගබලාගත යුතු බවද දන්වා තිබේ.
* තවද විකල්ප මාර්ග භාවිත කිරීමේදී අධික වංගු සහිත මාර්ග, බෑවුම් සහිත මාර්ග සහ පටු මාර්ගවල ධාවනය කිරීමට සිදුවිය හැකි බැවින් ඒ පිළිබඳ පරීක්ෂාකාරී වන ලෙස රියදුරු මහතුන්ට හා කොන්දොස්තර මහතුන්ට විශේෂයෙන් දන්වා සිටී.
* මෙම අයහපත් කාලගුණ තත්ත්වය යටතේ වුවද මගීන්ට ආරක්ෂාකාරී හා ගුණාත්මක පොදු මගී ප්‍රවාහන සේවාවවක් ලබා ගැනීම සම්බන්ධයෙන් අගය කීරීමක් සිදු කර ඇති අතර අවශ්‍ය සෑම අවස්ථාවකදීම ජාතික ගමනාගමන කොමිෂන් සභාව සම්බන්ධ කර ගැනීමට ක්ෂණික ඇමතුම් අංකය වන 1955 හා සම්බන්ධ වන ලෙස එම නිවේදනයේ වැඩිදුරටත් සඳහන් කර ඇත.
