හිටපු ජනාධිපති රනිල් වික්‍රමසිංහට එරෙහි නඩුව කොළඹ කොටුව මහේස්ත්‍රාත් අධිකරණය හමුවේ අද (ජන. 28) යළි කැඳවීමට නියමිත තිබේ.
2023 වසරේ බ්‍රිතාන්‍යයේ පැවති සිය බිරිඳගේ උපාධි ප්‍රදානෝත්සවයට පෞද්ගලික සංචාරයක් වශයෙන් සහභාගි වෙමින් පැය 36ක් තුළ රුපියල් ලක්ෂ එකසිය හැට හයකට වැඩි මුදලක් වැය කරමින් රජයේ මුදල් සාවද්‍ය ලෙස පරිහරණය කිරීම සම්බන්ධයෙන් අපරාධ පරීක්ෂණ දෙපාර්තමේන්තුව රනිල් වික්‍රමසිංහට විරුද්ධව අධිකරණයට කරුණු ඉදිරිපත් කර තිබේ.
මෙම නඩුව අද කොළඹ කොටුව මහේස්ත්‍රාත් ඉසුරු නෙත්තිකුමාර ඉදිරියේ කැඳවීමෙන් අනතුරුව රනිල් වික්‍රමසිංහගේ නඩුකරයට අදාළව මේ දක්වා සිදුකර ඇති විමර්ශනවල ප්‍රගතිය අපරාධ පරීක්ෂණ දෙපාර්තමේන්තුව අධිකරණයට දැනුම් දීමට නියමිත ය.
හිටපු ජනාධිපතිට එල්ල වන චෝදනා මොනවාද ?
හිටපු ජනාධිපති රනිල් වික්‍රමසිංහට එරෙහිව පොදු දේපළ පනත යටතේ චෝදනා ඉදිරිපත් කර ගොනුකර ඇති නඩුව අද (28) යළි කැඳවීමට නියමිතව තිබේ. ඒ කොළඹ කොටුව මහෙස්ත්‍රාත් අධිකරණයේදීය.
මෙම සිද්ධිය සම්බන්ධයෙන් 2025 වසරේ අගෝස්තු මස 22 වන දා අපරාධ පරීක්ෂණ දෙපාර්තමේන්තුව මගින් අත්අඩංගුවට ගත් හිටපු ජනාධිපති රනිල් වික්‍රමසිංහ එදින ම කොටුව මහේස්ත්‍රාත් අධිකරණය හමුවට ඉදිරිපත් කිරීමෙන් අනතුරුව අගෝස්තු මස 26 වන දා දක්වා රක්ෂිත බන්ධනාගාරගත කෙරිණි.
රක්ෂිත බන්ධනාගාරගත කෙරුණ ද බන්ධනාගාරයට රැගෙන යාමෙන් පසුව රනිල් වික්‍රමසිංහගේ සෞඛ්‍ය තත්ත්වය අයහපත් අතට පත්වීම හේතුවෙන් ඔහු කොළඹ ජාතික රෝහලට ඇතුළත් කෙරිණි.
පසුව ජාතික රෝහලේ දැඩි සත්කාර ඒකකයේ රැඳී සිටි රනිල් වික්‍රමසිංහගේ සෞඛ්‍ය තත්ත්වය සම්බන්ධයෙන් කොළඹ ජාතික රෝහලේ වෛද්‍ය කමිටුවක් විසින් ඉදිරිපත් කරන ලද වාර්තා සලකා බැලූ එවක කොළඹ කොටුව මහේස්ත්‍රාත් නිලුපුලී ලංකාපුර පසුගිය අගෝස්තු මස 26 වන දා රනිල් වික්‍රමසිංහ ඇප මත මුදා හැරීමට නියම කළා ය.
බ්‍රිතාන්‍යයේ ශ්‍රී ලංකා මහ කොමසාරිස්ගෙන් ප්‍රකාශයක්
මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුවේ විශේෂ පොලිස්‌ කණ්ඩායමක් බ්‍රිතාන්‍යයට ගොස් බ්‍රිතාන්‍යයේ එවක ශ්‍රී ලංකා මහ කොමසාරිස් වශයෙන් කටයුතු කළ සරෝජා සිරිසේන ඇතුළු පිරිසකගෙන් ප්‍රකාශ සටහන් කර ගත් බවත් වාර්තා විය.
එම ප්‍රකාශවල අන්තර්ගතය පිළිබඳවත් අපරාධ පරීක්ෂණ දෙපාර්තමේන්තුව අද අධිකරණයට කරුණු ඉදිරිපත් කරනු ඇතැයි අපේක්ෂා කෙරේ.
මේ අතර, රනිල් වික්‍රමසිංහට රාජ්‍ය මුදල් අවභාවිතාව සම්බන්ධයෙන් මහාධිකරණයේ අධිචෝදනා ඉදිරිපත් කිරීමට කටයුතු කරන බවත්, අපරාධ පරීක්ෂණ දෙපාර්තමේන්තුව වෙනුවෙන් පෙනී සිටින අතිරේක සොලිසිටර් ජනරාල් දිලීප පිරිස් ඉකුත්දා අධිකරණයට දැනුම් දී තිබිණි.
එම වාතාවරණය මධ්‍යයේ අදාළ නඩුකරය අද කොටුව මහේස්ත්‍රාත් අධිකරණය හමුවේ කැඳවීමට නියමිත ය.
