පාස්කු ප්‍රහාරය සම්බන්ධයෙන් අපරාධ පරීක්ෂණ දෙපාර්තමේන්තු භාරයේ පසුවන රාජ්‍ය බුද්ධි සේවයේ හිටපු ප්‍රධානී මේජර් ජනරාල් සුරේෂ් සලේට එරෙහි චෝදනා සනාථ වුවහොත් ඔහුට නිසි දඬුවම් හිමිවිය යුතු බව ෆීල්ඩ් මාර්ෂල් සරත් ෆොන්සේකා මහතා ප්‍රකාශ කරයි.
රටක නීතියේ ආධිපත්‍යය සියලු පුරවැසියන්ට එක හා සමානව ක්‍රියාත්මක විය යුතු බව පෙන්වා දෙන ඒ මහතා, සලේ සම්බන්ධයෙන් විශේෂ නීතියක් තිබිය නොහැකි බවත්, වරදක් කර ඇත්නම් ඊට අදාළ විපාක විඳීමට සිදුවන බවත් අවධාරණය කළේය. මෙවැනි කරුණු කරළියට එන විට ඇතැමුන් ආගමික මාතෘකා සහ ‘රණවිරු ලේබලය’ ඉදිරියට දමමින් ජනතාව නොමඟ යැවීමට උත්සාහ කරන බවද ඔහු පෙන්වා දෙයි.
මීට අමතරව, මෙරට ක්‍රියාත්මක වන ප්‍රබල දූෂිත වළල්ලක මහමොළකරුවන් වන්නේ රාජපක්ෂවරුන් බවට චෝදනා කළ සරත් ෆොන්සේකා මහතා, එම පවුල වටා රොක්වූ ජාවාරම්කරුවන්, ධනවත් ව්‍යාපාරිකයන් සහ රාජ්‍ය නිලධාරීන් එක්ව මහජන ධනය සහ ජාතික සම්පත් මංකොල්ලකා ඇති බව ප්‍රකාශ කළේය. මෑත කාලයේදී බැංකු නිලධාරීන් පවා සම්බන්ධ වෙමින් රටේ විදේශ විනිමය පසුපස දොරින් පිටකිරීම වැනි සිදුවීම් හරහා එම ජාලයේ තරම මනාව පැහැදිලි වන බව ඔහු සඳහන් කළේය.
දූෂිත දේශපාලනඥයන්ට එරෙහිව නීතිය දැඩිව ක්‍රියාත්මක කරමින් සිටින වත්මන් රජයට වසර 5ක සම්පූර්ණ කාලය පාලනය ගෙන යාමට ඉඩදිය යුතු බව ෆොන්සේකා මහතා අවධාරණය කරයි. ආණ්ඩුවේ සුළු අඩුපාඩු දුටු පමණින්, රට විනාශ කළ පැරණි දූෂිතයන්ට යළි රට භාරදීමට ජනතාව නොසිතිය යුතු බව ඔහු පවසයි.
වත්මන් විපක්ෂය ‘සුන්බුන්’ කණ්ඩායමක් ලෙස හඳුන්වමින් ඔහු වැඩිදුරටත් කියා සිටියේ, එහි සිටින නායකයින් දිරාගිය ගස් හා සමානව ‘කල් ඉකුත් වූ’ පිරිසක් බවයි. එවැනි නායකයින්ට යළි බලය හිමිවුවහොත් රට නැවතත් බරපතළ ආගාධයකට ඇද වැටීම නොවැළැක්විය හැකි බව ඔහු තරයේ කියා සිටියේය.
