රක්ෂිත බන්ධනාගාරගත කර සිටි හිටපු අමාත්ය ශෂීන්ද්ර රාජපක්ෂ, ලබන 29 වැනිදා දක්වා තවදුරටත් රක්ෂිත බන්ධනාගාර ගත කරන ලෙස කොළඹ මහේස්ත්රාත් අධිකරණය නියෝග කර තිබේ.
අදාළ නඩුව අද (26) කැඳවූ අවස්ථාවේදී කොළඹ මහේස්ත්රාත් අධිකරණය විසින් මෙම නියෝගය නිකුත් කරන ලදී.
අරගල සමයේ ගිනි තබන ලද, රජයේ ඉඩමක ඉදිකර තිබුණු නිවසකට අදාලව, වෙනත් පුද්ගලයෙකු හරහා වන්දි ලබා ගැනීමේ සිද්ධියක් සම්බන්ධයෙන් ඔහුට චෝදනා එල්ල වී තිබේ.
කොළඹ ප්රධාන මහේස්ත්රාත් අසංග එස් බෝදරගම මහතා ඉදිරියේ කරුණු දැක්වූ අල්ලස් කොමිසම අද(25) ඉල්ලා සිටියේ, කිරිඉබ්බන්වැව ශ්රී ලංකා පොදු ජනපෙරමුණ දේශපාලන කාර්යාලය අරගලකරුවන් විසින් 2022 දී ගිනිබත් කිරීමෙන් සිදුවූ හානියට රුපියල් 88850000.00 ක වන්දි මුදලක් රජයේ නිලධාරීන්ට බලපෑම් කළ ලබා ගනිමින් රාජ්ය දේපළ සාපරාදී සාවද්ය පරිහරණය කරන ලදැයි රක්ෂිත බන්ධනාගාර ගත ශෂීන්ද්ර රාජපක්ෂ නඩුව විභාග කර අවසන් වන තෙක් රක්ෂිත බන්ධනාගාර ගත කරන ලෙසයි.
සැකකරුට එරෙහිව සිදු කරන විමර්ශන පොදු දේපළ පනතෙහි වගන්තිවලට ගැනෙන වැරදි බැවින් හා දූෂණ විරෝධී පනතේ 139 වගන්තියට අයත්වන බැවින් ඇප ලබාදීම ප්රතික්ෂේප කරන ලෙසත් නඩු විභාගය අවසන් වන තෙක් රක්ෂිත බන්ධනාගාර ගත කරන ලෙසත් අල්ලස් කොමිසම වැඩිදුරටත් ඉල්ලා සිටියේය.
සෙවනගල, කිරි ඉබ්බන්වැව, සමගිපුර පිහිටි මහවැලි අධිකාරියට අයත් ඉඩමක අනවසරයෙන් ඉදිකර ඇති දේශපාලන කාර්යාල ඇතුළු දේපළ කිහිපයක් 2022.05.09 වන දින පැවති ජනතා අරගලයේදී හානියට පත් කිරීමෙන් අනතුරුව එම දේපළ රජයේ බව දැන දැනම වෙනත් පුද්ගලයෙකු යොදවා වන්දි මුදල් ලබා ගැනීම සිදුකර ඇති බවට පවසමින් අල්ලස් කොමිසම කරුණු ගොනු කළ පැමිණිල්ල කැඳවූ අවස්ථාවේදී මෙම ඉල්ලීම සිදු කළේය.
අදාල ඉල්ලීම් සම්බන්ධයෙන් සැකකාර පාර්ශ්වයේ කරුණු සලකා බැලිය යුතු හෙයින් පැමිණිල්ල පසුව කැඳවීමට මහේස්ත්රාත්වරයා නියෝග කළේය. ඒ අනුව දෙපාර්ශ්වයේ කරුණු සලකා බැලීම සඳහා පැමිණිල්ල යළි කැඳවීමට නියමිතයි.
