හිටපු අමාත්ය රාජිත සේනාරත්න එළඹෙන 09 දක්වා රක්ෂිත බන්ධනාකාර ගත කර තිබේ.
ඔහු අද(29) කොළඹ අධිකරණයේදී රිමාන්ඩ් භාරයට පත්කොට, කොළඹ ප්රධාන මහේස්ත්රාත් අධිකරණයට ඉදිරිපත් කිරීමෙන් පසුව කොළඹ ප්රධාන මහේස්ත්රාත් අසංක එස්. බෝදරගම මෙම නියෝගය නිකුත් කර තිබේ.
අල්ලස් කොමිසම ගොනුකර තිබූ වෙනත් නඩුවක් සඳහා රාජිත සේනාරත්න අද පෙරවරුවේ කොළඹ මහා අධිකරණය හමුවේ පෙනී සිටියේ ය.
ධීවර අමාත්යවරයා වශයෙන් කටයුතු කළ අවධියේ මෝදර ධීවර වරාය පෞද්ගලික සමාගමකට බදු දීමේ දී රජයට පාඩු සිදු කළේ යැයි චෝදනා කරමින් අල්ලස් කොමිසම විසින් රාජිත සේනාරත්න මහතා ඇතුළු විත්තිකරුවන් තුන්දෙනෙකුට එරෙහිව අල්ලස් කොමිසම විසින් කොළඹ මහා අධිකරණය හමුවේ නඩුවක් ගොනුකර තිබේ. එම නඩුව අද (29) කොළඹ මහාධිකරණ විනිසුරු ලංකා ජයරත්න මෙනවිය ඉදිරියේ කැඳවිණි.
එහිදී අල්ලස් කොමිසම වෙනුවෙන් පෙනී සිටි නීතිඥවරිය අධිකරණය හමුවේ කරුණු දක්වමින් සැකකරු මේ වනවිට මෙම නඩුව සම්බන්ධයෙන් ඇප මත මුදාහැර තිබෙන බවත්, ඔහුගේ ක්රියා කලාපය සම්බන්ධයෙන් අධිකරණය හමුවේ කරුණු දැක්වීමට අපේක්ෂා කරන බවත් සඳහන් කළාය.
අල්ලස් කොමිසම විසින් සිදු කරනු ලබන විමර්ශනයකට අදාලව මෙම සැකකරු දිගින් දිගටම ප්රකාශ ලබාදීමට පැමිණීම මගහැරීම නිසා ඉකුත් අගෝස්තු මස 12 වනදා විත්තිකරු අත්අඩංගුවට ගැනීම සඳහා වරෙන්තුවක් ලබාදී තිබෙන බවද නීතිඥවරිය පැවසීය.
එබැවින් මෙම විත්තිකරු ඇප පනත යටතේ ප්රතිපාදන උල්ලංඝනය කර ඇති හෙයින් මෙම නඩුව සඳහා ඔහුට ප්රදානය කර තිබූ ඇපය අවලංගු කර රිමාන්ඩ් භාරයට පත් කරන ලෙස අල්ලස් කොමිසමේ නීතිඥවරිය ඉල්ලා සිටියාය.
මෙහිදී රාජිත සේනාරත්න වෙනුවෙන් පෙනී සිටි ජනාධිපති නීතිඥ අනිල් සිල්වා අධිකරණය හමුවේ කරුණු දක්වමින් මෙම ඉල්ලීමට තමන් තරයේ විරුද්ධ වන බව පැවසීය.
ඇප පනත යටතේ තම සේවාදායකයාගේ ඇප අවලංගු කිරීමටත් තරම් කරුණු කිසිවක් පැමිණිල්ලේ ඉදිරිපත් කර නොමැති බව ඔහු කියා සිටියේය.
දෙපාර්ශවය විසින් ඉදිරිපත් කළ කරුණු සලකා බැලූ කොළඹ මහාධිකරණ විනිසුරු ලංකා ජයරත්න සැකකාර රාජිත සේනාරත්න මෙම නඩුව සඳහා මුල පටන් අඛණ්ඩව පෙනී සිට ඇති බව නඩු වාර්තාව පිරික්සීමේදී පෙනී යන බව සඳහන් කළාය.
කෙසේ වුවත්, මෙම විත්තිකරුට වරෙන්තුවක් නිකුත් වී තිබෙන බව සහ ඒ පිළිබඳව විත්තිකරුවන් දැනුවත්ව සිටින බවට මෙම අධිකරණයට කරුණු පැහැදිලි වී ඇතැයි සඳහන් කළ විනිසුරුවරිය ඉන් අනතුරුව ඔහු කොළඹ මහේස්ත්රාත් අධිකරණයේ පවතින නඩුවට ඉදිරිපත් කිරීමට පියවර ගන්නා ලෙසත් නියෝග කර සිටියාය.
කොළඹ මහේස්ත්රාත් අධිකරණයේ පවතින නඩුවට ඉදිරිපත් කරනතුරු ඔහු රිමාන්ඩ් භාරයේ තබාගන්නා ලෙසත් විනිසුරුවරිය බන්ධනාගාර නිලධාරීන්ට නියම කළාය.
ඒ අනුව විත්තිකාර රාජිත සේනාරත්න බන්ධනාගාර නිලධාරීන් කොළඹ මහේස්ත්රාත් අධිකරණයට රැගෙන විත් ඉදිරිපත් කොට තිබේ.
එහිදී ඔහුට එල්ල වූ වෝදනාව ලෙස සඳහන් වන්නේ,
2012 වසරේ මැයි මස 19 වෙනදා “සී වූ ප්රයිවට් ලිමිටඩ්” නැමැති කොරියානු සමාගමක් ඉදිරිපත් කළ යෝජනාවකට අනුව කිරින්ද ධීවර වරායේ පිරී තිබෙන වැලි ඉවත්කර ඒවා පිරිසිදු කර දේශීය වෙළඳපොළට මුදා හැරීමේ ව්යාපෘතියක් ආරම්භ කිරීම සඳහා එවකට ධීවර අමාත්යවරයා ලෙස කටයුතු කළ රාජිත සේනාරත්න අනුමැතිය ලබාදී තිබූ බව සඳහන් වේ.
මෙවැනි ව්යාපෘතියක් ක්රියාත්මක කිරීමට පෙර අමාත්ය මණ්ඩල අනුකමිටුවක් වෙත එම යෝජනා ඉදිරිපත් කර ඊට අදාළ පාරිසරික වාර්තා ඇතුළු වාර්තා කැඳවා අධ්යයනය කිරීමකින් අනතුරුව එවැනි ව්යාපෘතියක් ආරම්භ කිරීමට අනුමැතිය ලබාදීම සාමාන්ය පිළිවෙත වුවත්, මෙම ව්යාපෘතිය සඳහා සැකකාර හිටපු අමාත්යවරයා සම්මත ක්රමවේදයන්ගෙන් බැහැරව ධීවර වරාය නීතිගත සංස්ථාවේ සභාපතිවරයාගේන් වාර්තාවක් පමණක් කැඳවා එම ව්යාපෘතිය ක්රියාත්මක කිරීමට අනුමැතිය ලබාදී ඇති බවත් සඳහන්වේ.
එම ව්යාපෘතිය පැවරීමෙන් පසුව වැලි ඉවත් කිරීමට අවශ්ය පහසුකම් කිසිවක් අදාල කොරියානු සමාගම සතුව නොතිබූ අතර, ඉන් අනතුරුව එම ව්යාපෘතිය ක්රියාත්මක කිරීම සඳහා ධීවර වරාය නීතිගත සංස්ථාව සතුව තිබූ ” වැලිගොව්වා ” නෞකාව ඇතුළු පහසුකම් එම සමාගම වෙත ලබාදීමට සිදුවූ බවත් වාර්තාවේ.
මේ හේතුවෙන් ධීවර වරාය නීතිගත සංස්ථාවට රුපියල් ලක්ෂ 262 කට අධික පාඩුවක් සිදුවී ඇතැයි එය සඳහන් කළාය.
ඒ අනුව, මේ වන විට රාජිත සේනාරත්න ලබන සැප්තැම්බර් 09 දක්වා රක්ෂිත බන්ධනාගාරගත කිරීමට නියෝග කොට තිබේ.
